«Bolashaq» túlegine qatysty másele sheshimin tapty

<p>ASTANA. KAZINFORM &ndash; Otandasymyz Valerııa Gavrılenko &laquo;Bolashaq&raquo; baǵdarlamasymen Ulybrıtanııaǵa oqýǵa ketip, sodan qaıtpaı qalǵan. Ol kepilge qoıǵan múlkin shyǵaryp alǵannan keıin Halyqaralyq baǵdarlamalar ortalyǵy oqýdyń aqshasyn, naqty aıtqanda 30 mln teńge memleket qarjysyn garant bolǵan úshinshi tarap, ıaǵnı kepilgerlerden talap etken.</p>

«Qurmetti áriptester, búgingi vıdeoúndeýde men, Maqpal Dáribaeva jáne áriptesim Natalıa Vorobeva, «Bolashaq» halyqaralyq baǵdarlamalar ortalyǵyndaǵy rezonansty oqıǵa beıbit jolmen óz sheshimin tapqanyn aıtqymyz keledi. Ózderińiz biletindeı, apellıatsııalyq sottyń sheshimimen bizge medıatsııaǵa 2 apta ýaqyt berilgen edi. Osy ýaqyt aralyǵynda Ǵylym jáne joǵary bilim mınıstri Saıasat Nurbekuly men «Bolashaq» halyqaralyq baǵdarlamalar ortalyǵynyń basqarma tóraǵasy Álııa Qalqamanqyzynyń jyldam áreket etýimen, Valerııa Gavrılenko kepildikke qaıta páter qoıyp, oqýǵa ketken shyǵynnyń barlyǵyn ózi óteıtinin moıyndap, kelisimshartqa qol qoıǵan», - deıdi vıdeoúndeýde Maqpal Dáribaeva.

Sondaı-aq, kepilger qoldaý tanytqan jandarǵa alǵysyn aıtty.

«Túıitkildi másele sheshimin tapqansha, óz nazarynda ustaǵan mınıstr Saıasat Nurbekulyna, árdaıym bizben baılanysta bolǵan Álııa Qalqamanqyzyna alǵys aıtamyz. Árıne qurmetti áriptester, sizderdiń aqparattyq qoldaýlaryńyzdyń arqasynda bul máselege núkte qoıylyp, beıbit jolmen sheshimi tabyldy. Qazirgi tańda, bizdiń tarapymyzdan «Bolashaq» ortalyǵyna jáne de «Bolashaqtyń» tarapynan bizge eshqandaı shaǵym joq», - dedi ol.

Eske sala keteıik, buǵan deıin Kazinform agenttiginiń resmı saýalyna halyqaralyq ortalyq «Bolashaq» túleginiń isi medıatsııa tártibimen qaralyp jatqanyn jetkizgen edi.