«Bolashaq» túlegi týǵan aýylyna 12 mln teńgeniń laboratorııasyn syıǵa tartty

MERKІ. QazAqparat – Merki aýdanynda «Jomart túlek» jobasy aıasynda «Týǵan jerge týyńdy tik» ustanymyn ustaǵan jeke kásipker aýyl mektebine úlken syı jasady, dep habarlaıdy QazAqparat tilshisi.

Tátti aýyldyq okrýginde týǵan Ábýtálip Mútáli óziniń kindik qany tamǵan aýylyndaǵy №13 M.Mametova atyndaǵy orta mektepke quny 12 mıllıon teńgeni quraıtyn laboratorııany syıǵa tartty.

Kásibinen násibin tapqan ol «Bolashaq» baǵdarlamasy aıasynda AQSh –ta oqyp, elge kelgen soń STEM Academia» kompanııasynyń negizin qalaǵan. «STEM» álemdik júıesi baǵdarlamalaý jáne qurastyrý daǵdylaryn damytýǵa múmkindik syılaıdy. Sonymen qatar bul júıe oqýshylardyń ǵylymı-tehnıkalyq salaǵa degen qyzyǵýshylyqtaryn qoldaý maqsatynda robototehnıkasyn shyǵarmashylyq jáne synı qoldanýǵa baǵyt-baǵdar beredi.

Ábýtálip Mútáliniń bastamasymen «1000 ІT synyby –balalar úshin» jobasy qolǵa alynyp, qazirge 500-ge jýyq respýblıka aýmaǵyndaǵy mektepter zamanaýı qurylǵylarmen jabdyqtalyp otyr. Endi óziniń otbasynyń atynan «mekteptegi balalardyń bolashaǵy jarqyn bolsyn» degen maqsatta aýyl mektebiniń bir kabınetin tolyqtaı jabdyqtap berdi.

Ózi qalalyq jerde oqyǵanymen ata-anasy osy Tátti aýylynda týyp, qyzmet etken. Kishkentaıynan ákesi Mútálige «Men aýylǵa kómek bergim keledi» degen nıette ósken bala Ábýtálip óse kele armanyn júzege asyrdy.

ІT kabınettiń ashylý saltanatynda ardager ustazdar men aýyl aqsaqaldary izgi tilek nıetterin bildirip, sanaly da salıqaly urpaq ósirgen anasyna alǵystaryn bildirdi. Al mektep oqýshylary kontserttik baǵdarlama boıynsha ónerlerin ortaǵa salyp, Aıbar Raıymqul jergilikti aqyn Ábdimomyn Qońqabaevtyń jeke kásipkerge arnaǵan arnaý óleńin mánerlep oqyp berdi.