«Bolashaq» stýdentteri N.Oraz ben G.Álimgereı Amerıkada qazaq óneri men mádenıetin pash etti

ASTANA. QazAqparat - AQSh-tyń Kalıfornııa shtaty Montereı ınstıtýtynyń qabyrǵasynda «International Education Day» sharasy uıymdastyryldy. Sharaǵa «Bolashaq» baǵdarlamasy arqyly bilim alyp jatqan tanymal jýrnalıster Nurdildá Oraz ben Gúlnaz Álimgereı de qatysyp, halyq ánderin oryndap qana qoımaı, qazaqtyń keń dastarhanynan da kelgen qonaqtarǵa dám tatyrdy.

«Baýyrsaq pen kúlshege tańyrqaǵan jurtqa qurt pen tarynyń dámi jetispeı turǵandaı sezildi. Degenmen, qazaqtyń qara dombyrasynyń kúmbiri eldi eleń etkizip, erekshe iltıpatqa bólendi desek artyq aıtqandyq emes. Aıshylyq alys Amerıkadaǵy dúıim jurtqa qazaq halqynyń mádenıetin dáriptep, dombyramyzdyń kúmbirimen delebesin qozdyryp, óz salt-dástúrimizde az da bolsa tanystyrdyq degen oıdamyz» - deıdi olar óz sózinde.

Budan bólek olar aǵylshyn tilinde Qazaqstannyń kórikti jerleri men jetistigi týraly derekti fılm kórsetip, elimizdi jınalǵan jurtqa jan-jaqty tanystyrdy.

N.Orazdyń aıtýynsha, ýnıversıtettiń bul bastamasy árbir elden kelip bilim alyp jatqan stýdentterdiń ádet-ǵurpy men salt-dástúrin jergilikti jurtqa pash etý, sol arqyly áralýan mádenıetti ózara jaqyndastyrý nıetinen týyndaǵan. Sharaǵa 12 eldiń stýdentteri qatysyp, óz jurtynyń turmys-tirshiligin tanystyrǵan.