«Bolashaq» stıpendııasynyń ıegerleri Prezıdenttik jastar kadrlyq rezerviniń úlgisimen irikteldi
Mınıstrliktiń málimetinshe, bıyldan bastap «Bolashaq» halyqaralyq stıpendııasyn taǵaıyndaýdyń konkýrstyq rásimderi tolyǵymen avtomattandyrylyp, biryńǵaı onlaın-platformada ótip jatyr. Úlgi retinde Prezıdenttik jastar kadrlyq rezervine irikteý júıesi alynǵan.
«Birinshiden qujat qabyldaý tolyq avtomattandyryldy. Ol tek egov.kz portalynda júzege asyrylady. Ekinshiden úmitkerdiń ótetin barlyq irikteý kezeńi tsıfrlandyrylǵan. Úmitkerge jeke kabınetinde biregeı kod beriledi. Ótinish berýshiniń jeke derekteri biregeı sáıkestendirý júıesi arqyly kodtalady. Úshinshiden, irikteýdiń І kezeńi – keshendi testileý mazmuny sapalyq turǵydan ózgertildi. 2020 jyldan bastap úmitkerlerdiń ózdiginen ótinish berýine qoıylatyn negizgi talaptardy eskere otyryp, pándik bilimdi tekserý qajettigi joıyldy. Onlaın formatta ótetin testileý endi verbaldyq, sandyq jáne daǵdylyq-tulǵalyq suraqtardan turady. Sondaı-aq suraqtar úmitkerdiń qysqa merzimde jańa aqparatty óńdeı alý, taldaý, tulǵalyq qabiletin anyqtaýǵa baǵyttalǵan», - dep habarlaıdy mınıstrlikten.
Sonymen qatar onlaın platformada qoldanylatyn proktorıng júıesi úmitkerlerdiń jumys paraǵyn qaldyryp, kelesi paraqqa ótýine nemese testileý ýaqytynda jańa terezeni ashýyna múmkindik bermeıdi. Mundaı jaǵdaıda júıe ony buǵattap, testileý nátıjeleri joıylady.
«ІІ kezeń – táýelsiz saraptamalyq komıssııa múshelerimen derbes suhbat ta onlaın ótip jatyr. Suhbat barysynda sarapshylar suraqtaryn úmitkerge jeke kodymen ıdentıfıkatsııalaý arqyly ǵana qoıyp (aty-jónin kórmeıdi), naqty krıterııler boıynsha birden baǵalaıdy. Sarapshylardyń baǵasyn júıede ǵana kórýge bolady. Árbir sarapshy óziniń úmitkerge qoıǵan jeke baǵasyn ǵana kóre alady. Konkýrstyq irikteýdiń barlyq kezeńi beıne jáne aýdıo jazbaǵa alynatynyn atap ótý mańyzdy. Demek, onlaın format pen avtomattandyrý júıesi «Bolashaq» halyqaralyq stıpendııasyn taǵaıyndaýǵa konkýrstyq irikteýdiń sapasyn arttyryp qana qoımaı, búkil irikteý júıesin ashyq, qoljetimdi, yńǵaıly ári mobıldi ete alady. Konkýrstyq irikteýdiń eki kezeńiniń qorytyndysy boıynsha «Bolashaq» halyqaralyq stıpendııasyn taǵaıyndaý týraly sońǵy sheshimdi Shetelde kadrlar daıarlaý jónindegi respýblıkalyq komıssııa qabyldaıdy», - delingen habarlamada.
Bilim jáne ǵylym mınıstrligi 2020 jylǵy 4-9 qyrkúıek aralyǵynda konkýrstyq irikteýdiń birinshi legine «magıstratýra» boıynsha 100 úmitker, «doktorantýraǵa» 9 adam, «taǵylymdamaǵa» 5 adam - barlyǵy 114 úmitker qatysqanyn habarlaıdy.