«Bolashaq» stıpendııasynan 333 adam aıyryldy - S.Nurbek
Bul týraly búgin QR Prezıdentiniń «Bolashaq» halyqaralyq baǵdarlamasyn iske asyrý qorytyndylaryna arnalǵan Úkimet otyrysynan keıin BAQ ókilderine suhbat bergen «Halyqaralyq baǵdarlamalar ortalyǵy» AQ Prezıdenti Saıasat Nurbek málim etti.
Onyń atap ótýinshe, stýdentterdiń stıpendııadan aıyrylýynyń basty sebebi olardyń oqý úlgerimderine baılanysty bolyp otyr. «Otbasylyq problemalarǵa jáne josparlarynyń ózgerýine baılanysty stıpendııadan bas tartatyn stýdentter de bar», - deıdi ol.
S.Nurbektiń sózine qaraǵanda, stýdentterden oqýǵa tólengen qarjyny memleket paıdasyna óteýde barynsha jeńildikter qarastyrylǵan.
«Bizde jyljymaıtyn múlikti kepilge qoıý stıpendıattyń mindettemesin qamtamasyz etý úshin júrgiziledi. Bul mindettemeler oryndalmaǵan jaǵdaıda erekshe protsedýra bar. Erterekte biz bul máselelerdi sot tártibimen sheshetinbiz. Al qazirgi ýaqytta respýblıkalyq komıssııa sheshimimen stıpendıattyń áleýmettik jaǵdaıyn eskere otyryp, tólem jasaý kestesi qurylady. Eger azamat stıpendııadan qaǵylatyn bolsa, onda ol shyǵyndalǵan aqshany eshqandaı qosymsha tólemsiz, paıyzsyz 10 jyldyń ishinde qaıtarady», - dedi ortalyq basshysy.