«Bolashaq» stıpendııasyna qujat qabyldaý merzimi 10 qazanǵa deıin uzartyldy
Bul týraly OKQ-da «Bolashaq» stıpendııasynyń konkýrstyq irikteýiniń jańa kezeńi týraly baspaóz máslıhatyn ótkizgen «Halyqaralyq baǵdarlamalar ortalyǵy» AQ-nyń vıtse-prezıdenti Meıirjan Alpysbaı málim etti, dep habarlaıdy «QazAqparat» HAA tilshisi.
«2017 jyly «Bolashaq» stıpendııasyn taǵaıyndaý konkýrsyna qujattardy qabyldaý rásimine ózgerister engizildi. Qujattardy qabyldaý 29 mamyr - 15 qyrkúıek arasynda júzege asyrylady. Osy kezge deıin Shetelde kadrlardy daıarlaý jónindegi respýblıkalyq komıssııanyń sheshimi boıynsha 251 adam stıpendııa ıegeri atandy. Qajettilikke jáne qujattardy qabyldaý merziminiń sońynda qarbalas bolǵanyna baılanysty shetelde kadrlardy daıarlaý jónindegi respýblıkalyq komıssııa qujattardy qabyldaý merzimin 16 qazanǵa deıin uzartý jóninde sheshim qabyldady. Іrikteý kezinde 300 úmitker, onyń ishinde memlekettik qyzmetkerler, ǵylymı-pedagogıkalyq qyzmetkerler qujattaryn tapsyrdy. 29 mamyrdan bastap búginge deıin memlekettik qyzmetkerler sanaty boıynsha 113 úmitker qujattaryn tapsyrdy. 21-i stıpendıant atandy, 11-i konkýrs kezeńderinen óte almady. Qalǵandary irikteý ústinde», - deıdi Meıirjan Alpysbaı.
Onyń aıtýynsha, stıpendıant ataný konkýrsy alty týrdan turady. Atap aıtqanda, birinshisi ýájedemelik pen usynym hattaryn baǵalaý, ekinshi týr shet tilin bilý deńgeıin anyqtaý, úshinshiden memlekettik tildi bilý deńgeıin aıqyndaý, tórtinshiden keshendi testileý, besinshiden táýelsiz saraptamalyq komıssııamen áńgimelesý, altynshydan shetelde kadrlardy daıarlaý jónindegi respýblıkalyq komıssııanyń otyrysynda úmitkerler kandıdatýrasyn qarastyrý bolyp tabylady.
Stıpendııaǵa qujat tapsyrǵandardyń arasynda óńirlik ákimderdiń orynbasarlary, komıtet tóraǵalary, keńesshiler men memlekettik organdar basshylarynyń kómekshileri bar.