«Bolashaq» stıpendııasy: Injenerlik-tehnıkalyq mamandar úshin jeńildikter jasalady
Baspasóz qyzmetiniń málimetterine qaraǵanda, 2023 jyldan bastap ınjenerlik-tehnıkalyq qyzmetkerler men medıtsına mamandary jeńildetilgen sharttarmen «Bolashaq» halyqaralyq stıpendııasynyń konkýrstyq irikteýine qatysa alady.
«Memleket basshysynyń tapsyrmasy boıynsha ınjenerlik-tehnıkalyq kadrlardy daıarlaýǵa basymdyq beriledi. Úmitkerlerdi qoldaý úshin «Injenerlik-tehnıkalyq qyzmetkerler» jańa jeńildik sanaty engizildi. Sonymen qatar bizdiń bastamamyzben medıtsına qyzmetkerlerin irikteý qaǵıdalary jetildirildi. Atalǵan ózgertýlerdiń arqasynda qazaqstandyq dárigerler men tehnıkalyq qyzmetkerler merzimi 12 aıǵa deıingi tegin tildik daıyndyqtan óte alady», - dep atap ótti «Halyqaralyq baǵdarlamalar ortalyǵy» AQ Basqarma tóraǵasy Ánýar Janǵozın.
Sonymen birge jeńildigi bar úmitkerler qujat tapsyrǵan kezde sheteldik joǵarǵy oqý ornyna óz betimen túsýge mindetti emes. Olardyń stıpendııa taǵaıyndalǵannan keıin baǵdarlama aıasynda bilim alýǵa usynylatyn ýnıversıtetter tiziminen oqý ornyn tańdaýǵa múmkindigi bar.
Esterińizge sala keteıik, «Bolashaq» stıpendııasyn taǵaıyndaý konkýrsyna jeńildigi bar kandıdattardy qospaǵanda, úzdik sheteldik JOO-lardan shaqyrýy bar úmitkerler ǵana qatysady.
«Bolashaq» stıpendııasyn taǵaıyndaý konkýrsyna jeńildikpen qatysý úshin úmitker dıplomynyń ortasha baly – GPA keminde 4.0-ten 3.0 bolý tıis. Sondaı-aq keminde V1 deńgeıdegi memleketik tilden KAZTEST sertıfıkaty jáne shet tilin meńgerýdiń ortasha deńgeıin rastaıtyn qujat talap etiledi. Máselen, aǵylshyn tilinde oqyǵan jaǵdaıda, keminde 9.0-dan 5.0 deńgeıdegi IELTS sertıfıkatyn, qytaı tilinde – keminde 6-dan 3 deńgeıdegi HSK, nemis tilinde - S1-den B1-B2 deńgeıdegi Goethe-Zertifikat jáne t.b. usyný qajet.
Aıta keteıik, «Bolashaq» baǵdarlamasynyń sharttary boıynsha memleket stýdentterge oqý, eki jaqqa ushý, medıtsınalyq saqtandyrý, vızalyq alymdar men oqý materıaldaryna shyǵyndardy óteıdi. Oǵan qosa aı saıyn stıpendııa tólenedi.