«Bolashaq» stıpendııasynyń 60 paıyzy tehnıkalyq jáne IT mamandyqtarǵa beriledi
«Bolashaq» halyqaralyq baǵdarlamasy táýelsiz memleketimizdi damytýǵa, áleýmettik-ekonomıkalyq salasyn ilgeriletýge tıisti sala mamandaryn álemniń mańdaıaldy oqý oryndarynda bilim alýǵa múmkindik berýde. Memleket basshysynyń 2022 jylǵy 11 qańtardaǵy Parlament Májilisinde bergen tapsyrmalaryna sáıkes, «Bolashaq» stıpendııasy sheńberinde ındýstrııalandyrý kezeńinde el ekonomıkasyna qajet bolatyn ınjenerlik-tehnıkalyq baǵytta otandyq kadrlardy daıarlaý boıynsha tıisti ózgerister engizildi. «Bolashaq» baǵdarlamasy boıynsha tehnıkalyq jáne IT mamandyqtaryna grant sany 60% deıin kóbeıdi», - dep jaýap berdi mınıstrlik agenttik saýalyna.
Úmitkerlerdi qoldaý úshin «Injenerlik-tehnıkalyq qyzmetkerler» atty jańa jeńildik sanaty engizilgen.
Sonymen qatar mınıstrlik pen Halyqaralyq baǵdarlamalar ortalyǵynyń bastamasymen medıtsınalyq qyzmetkerlerdiń kvotalyq sanaty bekitildi.
Osylaısha 2023 jyldan bastap ınjenerlik-tehnıkalyq qyzmetkerler men medıtsına mamandary jeńildetilgen sharttarmen «Bolashaq» halyqaralyq stıpendııasynyń konkýrstyq irikteýine qatysa alady.
«Buǵan deıin irikteýge jeńildetilgen sharttarmen aýyldyq jerlerden úmitkerler ǵana qatysa alatyn. Bul – oqytýdyń osy baǵyttary boıynsha úmitkerlerdi qoldaýdyń qosymsha sharalarynyń biri. Atalǵan ózgertýlerdiń arqasynda qazaqstandyq dárigerler men tehnıkalyq qyzmetkerler jáne aýyldan shyqqan úmitkerler 12 aıǵa deıingi tegin tildik daıyndyqtan óte alady. Bul sharalar, Prezıdent tapsyrmasyna jáne el ekonomıkasyna tehnıkalyq mamandardyń jetispeýshiligine baılanysty engizildi», - deıdi Ǵylym mınıstrligi.
Jalpy «Bolashaq» baǵdarlamasymen osy kúnge deıin álemniń oqý oryndarynda 12 430 maman daıarlanǵan.
Onyń ishinde áleýmettik-gýmanıtarlyq baǵytta 55% maman oqysa, tehnıkalyq baǵyt boıynsha tek 36%-y bilim alǵan.