«Bolashaq» stıpendıattarynyń deni olıgarhtardyń nemese shendi-shekpendilerdiń balalary dep aıtý qısynsyz - zertteý

ASTANA. 5 qarasha. QazAqparat - «Bolashaq» stıpendıattarynyń deni olıgarhtardyń nemese shendi-shekpendilerdiń balalary dep aıtý qısynsyz. Bul týraly búgin elordada «Bolashaq» baǵdarlamasynyń tıimdiligin baǵalaý» atty zertteý nátıjesiniń qorytyndysy men ǵylymı monografııa jobasyn tanystyrý barysynda "Nur Otan" partııasynyń Qoǵamdyq saıasat ınstıtýtynyń basshysy Nurbek Saıasat málim etti.

«Qoǵam arasynda «Bolashaq» baǵdarlamasyna negizinen baıdyń, joǵary laýazymdy tulǵalardyń balalary oqıdy degen qate túsinik qalyptasqan. Zertteýde anyqtalǵanyndaı, «Bolashaq» stıpendıattarynyń 38 paıyzy áke-shesheleri shaǵyn jáne orta bıznestegi adamdar. ıAǵnı dúńgirshekteri, shaǵyn bıznesteri bar jeke kásipkerler, JShS basshylary. 35 paıyzynyń ata-analary memlekettik qyzmetkerler. Negizinen olar: dárigerler, ustazdar. Ata-analary jumyssyz nemese ózin-ózi qamtyǵandar sanatyna jatatyndar - 8 paıyz, zeınetkerler - 14 paıyz, áke-shesheleri joqtar - 2 paıyz. Osyǵan qarap-aq, stıpendıattardyń deni olıgarhtardyń nemese shendi-shekpendilerdiń balalary dep aıtý qısynsyz ekendigin kórýge bolady. Demek, «Bolashaq» baǵdarlamasyna áleýmettik sanattary ár túrli, qalyń buqara toptarynyń kez kelgen ókili túse alady», - deıdi N.Saıasat.

Aıta keteıik, "Nur Otan" partııasynyń Qoǵamdyq saıasat ınstıtýty «Bolashaq» baǵdarlamasynyń tıimdiligin baǵalaý» atty zertteý júrgizdi. Zertteýge 1338 respondent, 46 sarapshy, 100-den astam jumys berýshi tartyldy. Onda túlekterdiń 91 %-y «Bolashaq» stıpendııasy aýyl jastary men turmysy tómen otbasylardyń balalary úshin «áleýmettik jedelsaty» retinde tıimdi boldy dep sanaıtyndyqtaryn aıtqan. Al 93 paıyzy «Bolashaq» baǵdarlamasyna qatysý jáne onyń ashyqtyq jaǵdaıy ádiletti dep esepteıdi.