«Bolashaq» halyqaralyq stıpendııasyna taǵy 400-den astam adam ıe boldy

ASTANA. 27 tamyz. QazAqparat - Búgin Aqordada QR Memlekettik hatshysy Marat Tájınniń tóraǵalyǵymen Shet elderde kadrlar daıarlaý jónindegi respýblıkalyq komıssııanyń kezekti otyrysy ótti.

Taratylǵan málimetterge qaraǵanda, komıssııa sheshimine seıkes, «Bolashaq» halyqaralyq stıpendııasyna 427 adam, onyń ishinde magıstratýra baǵdarlamasy boıynsha - 224, doktorantýra aıasynda - 8, tyǵylymdamadan ótýge 195 jas úmitker ıe boldy.

«Jańa oqý jyldyń bastalýyna sanaýly kúnder qaldy. Sol sebepti biz búgin aldyn ala irikteýden ótken úmitkerlerdiń qujattaryn qarap, olardyń shet elderde tańdalǵan oqý oryndaryna der kezinde jetýine jaǵdaı jasaýymyz kerek. Óıtkeni, stıpendıattardy iriktep qana qoımaı, olardyń shetelde jan-jaqty bilim alýyna barlyq jaǵdaı jasaýǵa mindettimiz», - dep toqtaldy M. Tájın.

Sonymen qatar Memlekettik hatshy maýsymda ótken komıssııanyń otyrysynda tıisti memlekettik organdarǵa birqatar naqty tapsyrmalar berilgenin, búgingi jıynda sol tapsyrmalardyń oryndalý barysy, alda atqarylatyn jumystar qaralatynyn sóz etti.