«Bolashaq» halyqaralyq stıpendııasyna qujat qabyldaý bastaldy

ASTANA. QazAqparat - 2023 jyly «Bolashaq» halyqaralyq stıpendııasyn taǵaıyndaý konkýrsyna qatysýǵa qujat qabyldaý tórt kezeńnen turady. Qujat qabyldaýdyń alǵashqy kezeńi 27 qańtarǵa deıin jalǵasady, dep habarlaıdy QazAqparat.

Ekinshi kezeń – 2023 jylǵy 3 sáýir men 28 sáýir aralyǵynda, odan keıin 5 maýsym men 7 shilde aralyǵynda jáne 17 shilde men 15 qyrkúıek aralyǵynda júrgiziledi.

Konkýrstyq irikteý 20 qańtar men 31 jeltoqsan aralyǵynda ótedi. Ótinimder Egov.kz memlekettik qyzmetter portalynda qabyldanady.

Bıyl magıstratýra jáne rezıdentýraǵa - 395 stıpendııa, doktorantýraǵa - 50 stıpendııa, taǵylymdamadan ótý úshin 110 stıpendııa bólindi.

Usynylatyn JOO-lar tizimi álemniń 27 elinen 236 ýnıversıtetti qamtıdy. Basym mamandyqtar tizbesine 262 mamandyq kirdi.

Qazaqstan Respýblıkasynyń Prezıdenti Qasym-Jomart Toqaevtyń «Bolashaq» baǵdarlamasyn qaıta baǵdarlaý jónindegi tapsyrmasy boıynsha «ınjenerlik-tehnıkalyq mamandar» jeńildik sanaty bekitildi.

Sonymen qatar medıtsınalyq qyzmetkerler úshin jeńildik sanaty engizildi. Kvotalyq sanattardyń tegin tildik daıyndyqtan ótý múmkindigi bar.

Sondaı-aq olar qujat tapsyrǵan kezde sheteldik JOO-ǵa óz betimen túsýge mindetti emes.

Olar oqý ornyn stıpendııa taǵaıyndalǵannan keıin baǵdarlama aıasynda oqýǵa usynylatyn JOO-lar tiziminen tańdaı alady.

Esterińizge sala keteıik, jetekshi sheteldik joǵary oqý ornynan shartsyz shaqyrýy bar úmitkerler ǵana «Bolashaq» stıpendııasyn taǵaıyndaý konkýrsyna qatysa alady.

Olarǵa jeńildigi bar kandıdattar jatpaıdy.

Tolyǵyraq aqparat Halyqaralyq baǵdarlamalar ortalyǵynyń saıtynda jarııalanǵan.