«Bolashaq» boıynsha taǵylymdamadan ótetinderdiń basym bóligi - dárigerler

ASTANA. QazAqparat - Bıyl «Bolashaq» baǵdarlamasy boıynsha 700 stıpendııa bólindi. Bul týraly búgin QR Memlekettik hatshysy Gúlshara Ábdiqalyqovanyń qatysýymen ótken Shetelde kadrlar daıarlaý jónindegi respýblıkalyq komıssııanyń kezekti otyrysynan keıin «Halyqaralyq baǵdarlamalar ortalyǵy» AQ prezıdenti Ǵanı Nyǵymetov málim etti.

«Komıssııanyń otyrysynda birneshe máseleler qaraldy. Birinshisi - aldymyzdaǵy bes jylǵa arnalǵan «Bolashaq» baǵdarlamasynyń damý josparynyń iske asýy týraly bilim jáne ǵylym mınıstri baıandama jasady. Biz osy damý josparyn júzege asyrýǵa tolyqtaı kirisip kettik. Osy jyly birqatar ózgerister jasaldy. Sonyń ishinde aǵylshyn tili boıynsha talaptar kúsheıtildi. Ekinshiden, bıyl buǵan deıin bolmaǵan jańa kvotalyq sanat engizildi, ıaǵnı «magıstratýraǵa ınjenerlik-tehnıkalyq qyzmetker»  sanaty ashyldy. Osy rette búgingi otyrysta  ınjenerlik-tehnıkalyq mamandarǵa stıpendııa taǵaıyndaldy», - dep toqtaldy ol.

Ǵ. Nyǵymetovtyń sózine qaraǵanda, jańa stıpendııalar aıasynda «Bolashaq» baǵdarlamasy boıynsha sáýir-mamyr aılarynda 300-ge jýyq  qujat tapsyryldy.

«Sonyń 137 úmitkeri búkil kezeńnen jaqsy ótip, búgin stıpendııa ıegeri atandy. Osylardyń arasynda 100-i magıstratýraǵa, 8 adam doktorantýraǵa, qalǵan 29 úmitkerimiz qysqa merzimdi taǵylymdamaǵa barady. Olardyń kóbisi (28-i) - dáriger mamandar»,-dedi ol.

Injenerlik-tehnıkalyq, ІT-tehnologııa, geologııa, metallýrgııa, ónerkásip salalar mamandyqtary sekildi baǵyttaryn tańdaǵandar kóptep ótti.

«Bıyl qujat qabyldaýdyń eki kezeńi qalyp otyr. Kóktemgi kezeń boıynsha búgin 137 úmitkerge stıpendııa taǵaıyldy. Endi jazǵy kezeńde, ıaǵnı maýsym-shildede qujattardy qabyldap, onyń sheshimin tamyzdaǵy otyrysta jasaımyz. Keıinnen tamyz-qyrkúıekte qabyldanǵan qujattar boıynsha jeltoqsanda qosymsha stıpendııa beremiz. Jalpy, bıylǵa 700 stıpendııa bólindi», - dedi Ǵ. Nyǵymetov.

Atap aıtqanda, aǵymdaǵy jyldyń basynan beri baǵdarlama QR Prezıdentiniń «Bolashaq» halyqaralyq stıpendııasynyń 2016-2020 jyldarǵa arnalǵan jańa damý jospary boıynsha iske asyrylýda, qujatta ony jańartýdyń negizgi baǵyttary belgilengen.