Bolashaq Bethoven: Qazaqstandyq jas ónerpaz halyqaralyq baıqaýlardyń júldegeri
Arnaıy apparatpen estıdi
Kúlli adamzatty tańdaı qaqtyrǵan uly mýzykant Lıýdvıg van Bethoven estý qabiletinen aıyrylǵannan keıin eń keremet týyndylaryn jaryqqa shyǵarǵan. Shyǵys Qazaqstan oblysy Rıdder qalasynda týǵan Sanjar Saǵandyqov arnaıy apparat arqyly daýystyń 50 paıyzyn ǵana estıdi. Balanyń áke-sheshesi onyń bul kemistigin tek 4 jasynda ǵana bilgen.
«Sanjardy daýystap shaqyrǵanda keı-kezderi estimeı qalatyndyǵyn baıqadyq. Áýel basta oıynnyń qyzyǵyna berilip otyrǵan bolar dep topshyladyq. Alaıda bul jıi qaıtalanatyndyqtan tuńǵyshymyzdy dárigerge alyp bardyq», – deıdi ákesi Talǵat Saǵandyqov.
Dárigerler Sanjardan qulaq múkistigin anyqtaıdy. Medıtsına qyzmetkerleriniń aıtýynsha, bul aýrýdyń naqty emdik joldary áli kúnge deıin belgisiz kúıde qalyp otyr.
«Estý apparatyn satyp alǵan soń balamyz barlyq nársege tańqalatyn boldy. Kúmis qardyń aıaq astyndaǵy syqyry, nóserletken jańbyrdyń daýysy Sanjarǵa erekshe áser syılady. Birde ekeýimiz dalada serýendep júrgende ol menen «Áke, bul ne dybys?» dep surady. Men oǵan «jel soqqandaǵy aǵash japyraqtarynyń sybdyry ǵoı» dep jaýap berdim. Kózi janyp tańdanyp turǵan ulymdy kórgende et júregim eljirep ketti», – deıdi Talǵat.
Ýaqyt óte kele Sanjardyń mýzykaǵa degen áýestigi paıda bolǵan. Balalary 6 jasqa kelgen soń ata-anasy ony Rıdder qalasyndaǵy mýzyka mektebine beredi. Birinshi synypqa qabyldanǵan Sanjar Saǵandyqov fortepıanoda Bethovenniń «Elızaǵa» shyǵarmasyn alǵash ret estigende birden «osy týyndyny úırengim keledi» degen.
«Osydan keıin biz oǵan tıisti notalardy shyǵaryp berdik. Sanjar óziniń kúshimen 7-shi synyp oqýshylaryna arnalǵan kompozıtsııany qysqa ýaqyt ishinde úırenip aldy. Buny kórgen ustazdar tipti sener-senbesterin bilmeı qalǵan edi», – deıdi anasy Sánııa.
Sodan beri Sanjar mýzyka mektebinde júregine jaqyn týyndylardy úırenip, boıyna sińirýde. Onyń árdaıym kúrdeli shyǵarmalardy tańdaıtyny da bar. Sanjar notalarmen 10-15 mınýt oqyp-tanysady da, 10 mınýt ishinde kompozıtsııany túgeldeı jattap alady eken. Osyny baıqaǵan ata-anasy balalarynyń týma talant ekendigine kóz jetkizgen.
Talaı júlde ıegeri
Daryndy bala gıtarada da jaqsy oınaıdy. Eki aspaptyń tilin meńgergen ol talaı respýblıkalyq, halyqaralyq saıystarda top jaryp júr. Atap aıtsaq, 2016 jyly Semeı qalasynda ótken Latıf Hamıdı atyndaǵy halyqaralyq saıysta baq synasqan Sanjar birinshi oryndy qanjyǵasyna baılaıdy. 2017 jyly Barnaýlda ótken mýzyka dodasyna qatysyp, tulpary ozyq kelip jeńimpaz atanǵan. Sol saıysta belgili reseılik mýzykanttar rıdderlik balaqaıdyń ónerine oń baǵasyn beripti.
«2018 jyly Rıdderde qalalyq talanttylar baıqaýy uıymdastyryldy. Sonyń ishinde úzdik tanylǵandarǵa oblystyq dodaǵa joldama berilgen edi. Synnan súrinbeı ótken balamyz Shyǵys Qazaqstanda aldyna jan salmaı, top jarǵannan keıin Astana qalasynda ótetin halyqaralyq saıysqa attandy. Onǵa jýyq memleketten kelgen 400-den astam qatysýshy óner kórsetken básekede úkilep úmit artqan maqtanyshymyz birinshi oryndy ıelendi. Mápelep ósirgen balaqaıymyzdyń árqashanda tileýin tilep otyratyn bizdiń qýanyshymyzda shek bolmady», – deıdi Talǵat Saǵandyqov.
2021 jyly Sanjar Bolgarııada ótken halyqaralyq baıqaýǵa qatysqan. Koronavırýs pandemııasyna baılanysty onlaın formatta ótken jarysta taǵy da jeńimpaz atandy.
Búgingi tańda Óskemen qalasyndaǵy Nazarbaev zııatkerlik mektebinde bilim alyp júrgen Sanjar mýzyka álemine jan-tánimen ǵashyq. Boıynda daryny bar balanyń maqsaty aıqyn, senimi berik.