«Bolashaq» basshysy «soǵys» jarııalaǵan túlekke jaýap berdi
Buǵan deıin «Bolashaq» baǵdarlamasymen bilim alǵan Maıgúl Sadyqova áleýmettik jelide Halyqaralyq baǵdarlamalar ortalyǵyn sotqa berýge nıetti ekenin málimdegen edi.
«AQSh-taǵy oqýdan oralǵanyma 8 jyldyń júzi bolsa da, olar Pavlodar oblysy Aqsý qalasyndaǵy anamnyń páterin kepilden shyǵarmaı otyr. Munyń sebebin osy jyldar boıy «Áleýmettik jumys» dıplomy boıynsha jumys istemegenimmen túsindiredi. Iá, men JShS-de aýdarmashy bolyp eńbek ettim (meniń alǵashqy jumysym), keıinirek til úırenetin kýrs ashyp, sabaq berdim (Jeke kásipkerlik retinde), áli kúnge deıin aýdarma jumystarymen aınalysamyn. Sondaı-aq, óz mamandyǵym boıynsha EUÝ-da magıstratýrada grantta oqydym. Taǵy bir jumysym boldy - «Astana Opera» teatrynda kelisimsharttardy aýdardym. Qaı jerden jumys tabylsa, sony istedim. Qansha talpynsam da, áleýmettik salada jumys taba almaýym - meniń kinám emes. Eń bastysy, óz elimde 5 jyl ter tóktim», - dep jazǵan Maıgúl Sadyqova.
«Búkil el mekeme tarapynan jasalatyn qysymdy bilýi tıis. Jumysqa ornalasýǵa esh kómek kórsetpeıdi, al 11 jyl burynǵy kelisimshart boıynsha, 5 jyldyq eńbek ótilimdi talap etedi. Soǵysty qalasańyzdar, ol da bolady», - dep túıindegen sózin «Bolashaqtyń» túlegi.
Keıinirek, Halyqaralyq baǵdarlamalar ortalyǵynyń basshysy buǵan áleýmettik jelide jaýap jazdy.
«Maıgúl Sadyqovanyń aryzy boıynsha. Bizge soǵys kerek emes. Túlektermen jumys boıynsha departament jumysynda kemshilikter boldy, onymen kelisemin. Departament dırektory sáýir aıynda óz erkimen jumystan shyqty. Maıgúldi ortalyqqa shaqyrdyq. Nátıjesin ortalyqtyń saıtynda jarııalaımyz», - dep jazdy Janbolat Meldeshov áleýmettik jelide.
Sondaı-aq, Maıgúl Sadyqovanyń máselesi boıynsha Halyqaralyq baǵdarlamalar ortalyǵynyń Feısbýktegi resmı akkaýntynda tolyqqandy jaýap berildi. Onda HBO basshylyǵy atalǵan túıitkildi jáne túlektermen jumys departamentiniń kemshilikterin moıyndady.
«...2015 jyldyń 6 mamyrynda stıpendıat Halyqaralyq baǵdarlamalar ortalyǵyna páterdi kepilden shyǵarý týraly ótinish jazdy. Tek 5 jyl ótken soń ǵana, túlektermen jumys departamentiniń qyzmetkerlerinde mamandyq boıynsha eńbek etpeýge qatysty suraqtar týyndaǵan. Osyǵan baılanysty, atalǵan máseleniń túlektermen jumys departamentiniń qateligi ekenin moıyndaımyz», - delingen resmı akkaýnt jazbasynda.
Aıta keteıik, atalǵan máselelermen aınalysqan túlektermen jumys departamentiniń burynǵy basshysy 2017 jyldyń 7 sáýirinde óz erkimen jumystan ketken.
«Qazirgi ýaqytta HBO túlektermen jumys departamentiniń qyzmetkerleri Maıgúlmen habarlasty jáne máseleniń mán-jaıyn anyqtap, kómek kórsetý úshin ony ortalyqqa shaqyrdy», - dep túsindirdi HBO.
Odan bólek, jazbada «QR Bilim jáne ǵylym mınıstrliginiń HBO ujymynyń atynan jazylǵan aryz boıynsha keshendi qyzmettik tekserýdiń aıaqtalǵany» habarlanǵan. HBO ujymy basshylyqty jumysqa týystaryn qabyldady jáne «jerlestikke» jol berdi dep aıyptaǵan edi. Tekserý nátıjesi boıynsha, atalǵan faktiler rastalmady. Búginde ortalyqta shtattyq sanatta 120 adam jumys isteıdi. Onyń 7 paıyzy ǵana nemese 8 adam - Ońtústik Qazaqstan oblysynyń týmasy. Onyń ústine, atalǵan qyzmetkerler J.Meldeshov HBO basshylyǵyna taǵaıyndalmaı turyp jumysqa qabyldanǵan.