«Bolashaq» baǵdarlamasynyń jazǵy kezeńindegi 176 stıpendııanyń ıegeri belgili boldy (FOTO)

ASTANA. QazAqparat - «Bolashaq» baǵdarlamasy aıasynda qujattar qabyldaýdyń jazǵy kezeńinde 176 stıpendııanyń ıegeri belgili boldy. Búgin QR Memlekettik hatshysy Gúlshara Ábdiqalyqovanyń qatysýymen Shetelde kadrlar daıarlaý jónindegi respýblıkalyq komıssııanyń kezekti otyrysynan keıin «Halyqaralyq baǵdarlamalar ortalyǵy» AQ prezıdenti Ǵanı Nyǵymetov málim etti.

Budan buryn habarlanǵandaı, 2016 jylǵy 11 sáýirden 13 mamyrǵa deıin qujattar qabyldaýdyń birinshi, ıaǵnı kóktemgi kezeńi ótkizildi. Bıylǵy maýsym aıynyń sońyna qaraı 137 úmitkeri búkil kezeńnen jaqsy ótip, stıpendııa ıegeri atandy. Osylardyń arasynda 100-i magıstratýraǵa, 8 adam doktorantýraǵa, qalǵan 29 úmitkerimiz qysqa merzimdi taǵylymdamaǵa barady. Olardyń kóbisi (28-i) - dáriger mamandar.

«Endi maýsym-shilde aılarynda qujattardy qabyldaýdyń jazǵy kezeńi boldy. 400-den astam qujattar túsip, sonyń 176-sy stıpendııa ıegeri atandy. Kóbisi magıstratýra men doktorantýraǵa baratyn bolady. Qalǵan 70-ke jýyq azamat taǵylymdama baǵytynda barady», - dedi ol.

Aldaǵy ýaqytta kúzgi kezeń boıynsha tıisti sheshim shyǵarylady. Jalpy, bıylǵa 700 stıpendııa bólindi. Atap aıtqanda, aǵymdaǵy jyldyń basynan beri baǵdarlama QR Prezıdentiniń «Bolashaq» halyqaralyq stıpendııasynyń 2016-2020 jyldarǵa arnalǵan jańa damý jospary boıynsha iske asyrylýda, qujatta ony jańartýdyń negizgi baǵyttary belgilengen.

«Elbasynyń qoldaýy arqasynda «Bolashaq» baǵdarlamasy bıýdjet jaǵynan tapshylyq bolǵan joq. Osy jyly 700 stıpendııa bólinip otyr. Jalpy alǵanda 20 mlrd. teńgege jýyq qarajat búginde shetelde oqyp jatqan 1,5 myń stýdentke jáne bıylǵy jańa 700 stıpendııaǵa jumsalady. Ózderińiz bilesizder, 137 stıpendııa jyldyń basynda bólindi, búgin 176-sy qamtyldy, al qalǵan 400-ge jýyq stıpendııa jyldyń sońyna deıin bólinbek. Búginnen qyrkúıektiń sońyna deıin qujattardy qabyldaýdyń jańa kezeńi bastalyp ketti»,-dep túıdi sózin Ǵ. Nyǵymetov.