«Bolashaq» baǵdarlamasymen oqyǵan munaıshylardyń jartysy sheteldik kompanııalarda jumys isteýde - Ǵanı Nyǵmetov
Bul týraly búgin KAZENERGY Eýrazııalyq forýmynda «Halyqaralyq baǵdarlamalar ortalyǵy» AQ prezıdenti Ǵanı Nyǵmetov málim etti.
Onyń habarlaýynsha, munaı-gaz isi, munaı-gaz salasyndaǵy mashına jasaý sektorynyń ınjeneri, munaıhımııa, munaı men gaz kenishterin barlaý jáne óńdeý mamandyqtary boıynsha, «Bolashaq» baǵdarlamasymen 1993 jyldan beri 414 stıpendıat oqyp shyqqan. Qazirgi ýaqytta taǵy 45 stýdent «Bolashaq» baǵdarlamasy aıasynda shetelde bilim alýda.
«Sol túlekterdiń 14 paıyzy memlekettik jáne kvazımemlekettik mekemelerde qyzmet isteýde, 47 paıyzy - shetel jáne halyqaralyq kompanııalarda, 37 paıyzy - jeke-menshik kompanııalarda jumys istep jatyr. Bul mamandyqqa degen suranystyń baryn kórsetedi jáne «Bolashaq» baǵdarlamasy sol múmkindikti jasap berip otyr», - deıdi Ǵ.Nyǵmetov.
Ǵanı Nyǵmetovtiń sózine qaraǵanda, 2012-15 jyldar aralyǵynda «Bolashaq» stıpendııasynyń sany jyl sanap tómendep keledi. «Alaıda bul «Bolashaq» baǵdarlamasynyń sapasyn jaqsartýǵa úlken serpin berdi. Bizdiń basty nazarymyz úmitkerlerimizdiń sapasyna, magıstratýra, doktorantýra jáne tájirıbe baǵdarlamalarynyń sapasyna oıysty», - deıdi ol.