«Bolashaq» baǵdarlamasymen oqýǵa nıetti medıtsına mamandaryna jeńildik jasalady

ASTANA. QazAqparat – «Bolashaq» baǵdarlamasy boıynsha oqýǵa nıetti medıtsına mamandaryna jeńildik jasalady. Ortalyq kommýnıkatsııalar qyzmetinde ótken brıfıngide «Halyqaralyq baǵdarlamalar ortalyǵy» AQ Basqarma tóraǵasy Ánýar Janǵozın osylaı málimdedi, dep habarlaıdy QazAqparat tilshisi.

«Bolashaq» stıpendııasy aıasynda medıtsınalyq qyzmetkerlerge qoıylatyn talaptardy jetildirý qarastyrylyp otyr. Statıstıkaǵa sáıkes, kadrlardy daıarlaýdaǵy negizgi másele – shet tilin meńgerý deńgeıiniń tómendigi. Densaýlyq saqtaý qyzmetkerleri úshin múmkindikterdi keńeıtý jáne qyzyǵýshylyǵyn arttyrý úshin arnaıy jeńildik sanatyn engizýdi qarastyramyz. Olarǵa bir jyldyq tildik daıyndyqtan ótip, stıpendııa taǵaıyndalǵannan keıin sheteldik ýnıversıtetke túsý múmkindigi beriledi», - dep toqtaldy Ánýar Janǵozın.

Onyń málimdeýinshe, aldaǵy ýaqytta baǵdarlama arqyly shetelde bilim alýǵa nıetti aýyldan kelgen úmitkerlerge de jeńildik jasalmaq.

«Olar úshin aǵylshyn tilinen IELTS emtıhanynyń kórsetkishi 6,0 baldan 5,0 balǵa deıin tómendetiledi. Sondaı-aq, olarǵa bir jyldyq tildik daıyndyqtan ótý múmkindigi beriledi», - dedi «Halyqaralyq baǵdarlamalar ortalyǵy» AQ Basqarma tóraǵasy.

Aıta keteıik, «Bolashaq» baǵdarlamasy boıynsha qujat qabyldaý 14 qazanda aıaqtalady. Ánýar Janǵozınniń aıtýynsha, búginge deıin túsken ótinishterdiń basym bóliginde úmitkerler tehnıkalyq mamandyqtardy tańdaǵan.

Budan ózge, atalǵan baǵdarlamamen sheteldik ýnıversıtetterde bilim alǵan túlekterdiń eńbekpen óteý merzimi qysqarýy múmkin.