«Bolashaq» baǵdarlamasymen bakalavrıatqa grant bólý qaıta jańǵyrady

ASTANA. QazAqparat – Ǵylym jáne joǵary bilim mınıstri Saıasat Nurbek «Bolashaq» memlekettik baǵdarlamasyna qatysty birneshe jańashyldyqty jarııa etti, dep habarlaıdy QazAqparat tilshisi.

«Bolashaq» baǵdarlamasy kerek. Biz qazir ony ózgertip jatyrmyz. Iá, buryn buqaralyq baǵdarlamaǵa aınalyp ketti, biraz adamdar bardy. Aldaǵy ózgeristerge kelsek, «Bolashaq» baǵdarlamasynda bakalavrıatty qaıtaramyz, ol osydan 12-13 jyl buryn jabylǵan edi. Elimizde sońǵy ýaqytta daryndy, bilimdi oqýshylar álemniń túrli ýnıversıtetinen kóptegen shaqyrtý alady. Álemniń joǵary oqý oryndary daryndy balalardy halyqaralyq olımpıada jáne ǵylymı jobalary jeńimpazdarynyń arasynan tańdap alady»,- dedi Saıasat Nurbek tilshi Nartaı Aralbaıulynyń bergen suhbatynda.

Onyń aıtýynsha, endi elimizdiń daryndy balalaryn «Bolashaq» baǵdarlamasy arqyly shetelge bilim alýǵa jiberý josparlanyp otyr.

«Basty talap – olar elge qaıtýy kerek. Áıtpese, bizdiń altyn basty balalarymyz shetelge aǵylyp jatyr. Bul bastama kelesi jyly iske qosylady. Sonymen qatar granttardyń basym bóligi tehnıkalyq mamandyqtarǵa beriledi. Baǵdarlamaǵa qatysty taǵy bir jańashyldyq, buǵan deıin konkýrs jarııalanady, oǵan kez kelgen adam qatysa alatyn edi. Endi biz otandyq iri kompanııalarǵa baryp, olardan qandaı mamandar kerektigin surap shyǵamyz. Olar ótinish bildiredi, sonyń negizinde biz tapshy degen mamandardy shetelde oqytyp beremiz», - deıdi ol.

Sondaı-aq, mınıstr «Bolashaq» baǵdarlamasy boıynsha granttar sany shektelip, sapaǵa erekshe mán beriletinin aıtty.