«Bolashaq» baǵdarlamasymen álemniń taǵy 25 oqý ornynda bilim alýǵa bolady

ASTANA. QazAqparat – Ǵylym jáne joǵary bilim mınıstri Saıasat Nurbek «Bolashaq» halyqaralyq stıpendııasyn iske asyrýdyń keıbir sharalary týraly» buıryǵyna qol qoıdy. Oǵan sáıkes, «Bolashaq» baǵdarlamasymen bilim alatyn qazaqstandyqtar úshin sheteldik joǵary oqý oryndarynyń qaraty keńeıedi, dep habarlaıdy QazAqparat tilshisi.

Qujatta jazylǵandaı, bıyl QS World University Rankings, Times Higher Education World University Rankings sııaqty halyqaralyq akademııalyq reıtıngter jańardy.

Osyǵan baılanysty «Bolashaq» baǵdarlamasymen bilim alýǵa bolatyn sheteldik oqý oryndarynyń qatary keńeıdi.

Atap aıtqanda, qazaqstandyqtar endi myna ýnıversıtetterge túse alady:

- San-Paýlý ýnıversıteti (Sao Paulo ýnıversıteti);

- Lýven katolıktik ýnıversıteti (Université Catholique de Louvain);

- Berlındegi Gýmboldt ýnıversıteti (Berlın Gýmboldt ýnıversıteti);

- Pompeý Fabra Ýnıversıteti (Universidad Pompeu Fabra);

- Padýa ýnıversıteti (Università di Padova);

- Sychýan ýnıversıteti (Sichuan University);

- Ońtústik ǵylym jáne tehnologııalar ýnıversıteti (Southern University of Science and Technology);

- Lozanna federaldy polıtehnıkalyq mektebi (Swiss Federal Institute of Technology Lausanne);

- Ýhan Ýnıversıteti (Wuhan University);

- University of California, Santa Cruz.

Sondaı-aq, «Bolashaq» baǵdarlamasyn tehnıkalyq mamandyqtarǵa baǵdarlaý úshin ınjenerlik-tehnıkalyq beıindegi kadrlardy daıarlaýǵa arnalǵan mynadaı frantsýz jáne vengr joǵary oqý oryndarynda bilim alýǵa múmkindik usynylady:

- Joǵary basqarý, aqparattyq tehnologııalar jáne kommýnıkatsııa mektebi (IMT);

- Joǵary ınjenerlik mektep (ESTP);

- Lıonnyń ulttyq qoldanbaly ǵylymdar ınstıtýty (INSA);

- Ulttyq kópirler men joldar mektebi (ParisTech);

- Grenobl Alpi ýnıversıteti (Grenobl polıtehnıkalyq ınstıtýtyn qamtıdy);

- Lotarıngııa Ýnıversıteti;

- Strasbýrg Ýnıversıteti;

- Pýate Ýnıversıteti;

- Bordo Ýnıversıteti;

- Eks-Marsel Ýnıversıteti;

- Lıon Joǵary Injenerlik Mektebi;

- Nant Joǵary Injenerlik Mektebi;

- Bordo saıası zertteýler ınstıtýty (Science Po Bordeaux)

- Seged ýnıversıteti;

- Debretsen ýnıversıteti.

«JOO tiziminiń qoldanystaǵy redaktsııasynda 236 JOO bar. Osy tolyqtyrýdy eskere otyryp, olardyń sany 28 elden 261 oqý ornyna deıin ulǵaıady», - delingen qujatta.

Buıryq alǵash jarııalanǵan kúnnen, ıaǵnı 12 qyrkúıekten bastap kúshine endi.