«Bolashaq» baǵdarlamasy aıasynda eldegi tapshy mamandyqtardyń maqsatty toptary uıymdastyrylady - B.Jumaǵulov
Bul týraly búgin Úkimet otyrysynda QR Prezıdentiniń «Bolashaq» halyqaralyq baǵdarlamasyn iske asyrý qorytyndylarymen tanystyrǵan QR Bilim jáne ǵylym mınıstri aıtty.
B.Jumaǵulovtyń sózine qaraǵanda, QR Memlekettik hatshysynyń tóraǵalyǵymen ótken Respýblıkalyq komıssııanyń sońǵy otyrysynda mamandyq toptaryn naqty daıarlaý týraly sheshim qabyldanyp ta qoıǵan.
«Bul mádenıet, jýrnalıstıka, aqparattyq tehnologııalar salasyna, sondaı-aq tehnıkalyq jáne qoǵamdyq-saıası mamandyqtarǵa, ulttyq qaýipsizdikke qatysty.
Bizdiń mınıstrlik tıisti ortalyq organdarmen birlesip, osyndaı toptardy jasaıtyn bolady», - dedi ol.
B.Jumaǵulovtyń atap ótýinshe, eldegi suranysty tolyq qanaǵattandyrý úshin mamandyqtardyń ataýyna ǵana emes, daıarlaý mazmunyna da nazar aýdarýymyz qajet. Dıssertatsııalyq jáne zertteý jumystarynyń taqyryptaryn tańdaýda stıpendıattardy mınıstrlik «Qazaqstan - 2050» Strategııasyndaǵy mindetterdi iske asyrýǵa baǵyttaıtyn bolady. «Bul úshin memlekettik organdar óz salasyndaǵy basym taqyryptardyń spektrin anyqtap, Bilim jáne ǵylym mınıstrligine usynýy qajet», - dedi B.Jumaǵulov.