«Bolashaq» baǵdarlamasy arqyly grant bólinetin elderdiń tizimine 4 jańa el qosyldy

NUR-SULTAN. QazAqparat - Qazaqstanda «Bolashaq» bilim berý baǵdarlamasy aıasynda stýdentterdi oqytý aýqymy 4 elge keńeıtildi. Olardyń qataryna Avstrııa, Chehııa, Irlandııa jáne Ońtústik Afrıka kirdi. Sondaı-aq tizimge Gonkong (Qytaı) qosyldy, dep habarlaıdy QR Bilim jáne ǵylym mınıstrliginiń baspasóz qyzmeti.

Osylaısha, endi qazaqstandyqtar «Bolashaq» baǵdarlamasy boıynsha 27 elde oqı alady.

Esterińizge sala keteıik, bıyl ótinimderdi qabyldaý 4 mamyrda bastalyp, 27 qazanǵa deıin jalǵasady. Búgingi tańda qazaqstandyqtardan 158 ótinish kelip túsken.

Pandemııaǵa qaramastan, Halyqaralyq baǵdarlamalar ortalyǵy qazaqstandyqtar bilim ala alatyn sheteldik joǵary oqý oryndarynyń sanyn ulǵaıtty. Eger ótken jyly olardyń sany 138 bolsa, 2021-2023 jyldary – 207 joǵary oqý orny qazaqstandyq azamattardy oqýǵa qabyldaýǵa daıyn.

Bul rette, joǵary oqý oryndaryn irikteý talaptary da kúsheıtilip otyr. Máselen, JOO úsh halyqaralyq akademııalyq reıtıngke kirýi tıis.

Stıpendııalardy taǵaıyndaý júıesine de ózgerister engizilip jatyr. Ol úsh kezeńnen turady. Osylaısha, maýsym aıynda 90 stıpendııa, tamyzda – 170 stıpendııa jáne qarashada – 125 stıpendııa bólinedi. Bul stıpendııany osy kezeńge berilgen ótinimderge sáıkes birkelki bólýge múmkindik beredi.

2021 jyly «Bolashaq» baǵdarlamasy boıynsha oqýǵa 1055 stıpendııa bólindi. Onyń 555-i magıstratýra, rezıdentýra, doktorantýra jáne taǵylymdama baǵdarlamalary boıynsha bólinedi. Taǵy 500 stıpendııany otandyq ǵalymdar alady.