Bolashaǵymyz úshin daýysymdy berdim - Oralbaı Ábdikárimov

NUR-SULTAN. QazAqparat - Búgin elordada Oqýshylar saraıyndaǵy saılaý ýchaskesinde memleket jáne qoǵam qaıratkeri Oralbaı Ábdikárimov pen QHA Tóraǵasynyń orynbasary Janseıit Túımebaev daýys berdi, dep habarlaıdy QazAqparat tilshisi.

«Búgingi tarıhı kúnde bolashaǵymyz úshin ózimniń daýysymdy berdim. Árıne, usynylǵan kandıttardyń baǵdarlamasyna qarap, bizdiń halyq óziniń bolashaǵy úshin daýys berip jatyr. Sonyń ishinde eń utymdysy, senimdisi, halyqqa jaqyny, sondaı-aq bolashaǵyn tanıtyn baǵdarlamaǵa tańdaý jasalady. Osy oraıda búgin men daýys bergen kandıdat elimizdiń damýyn qamtamasyz etedi dep oılaımyn», - dedi Oralbaı Ábdikárimov.

Eske sala ketsek, búgin Qazaqstan Prezıdentin kezekten tys saılaý bastaldy.

QR Prezıdentiniń kezekten tys saılaýynda el ishinde jáne shet elderde 9 968 daýys berý ýchaskesi jumys isteýde. Saılaý týraly Konstıtýtsııalyq zańǵa sáıkes, daýys berý ýaqyty standartty (saǵat 7:00-20:00 aralyǵy) bolady. Batys Qazaqstan, Aqtóbe, Atyraý, Mańǵystaý, Qyzylorda oblystarynda ýaqyt aıyrmashylyǵyna baılanysty saılaý ýchaskeleri jergilikti ýaqyt boıynsha saǵat 07:00-de - Nur-Sultan ýaqyty boıynsha saǵat 08:00-de ashyldy.