Bokstan olımpıadalyq irikteý týrnıri: Ábilhan Amanqul «kúmis» aldy

AMMAN. QazAqparat – Iordanııanyń Amman qalasynda ótip jatqan bokstan Olımpıadaǵa irikteý týrnırinde el qorjy ekinshi kúmis medalmen tolyqty, dep habarlaıdy QazAqparat tilshisi.

75 keli salmaqta synǵa túsken Ábilhan Amanqul týrnır fınalynda fılıppındik Eýmır Marsıalmen judyryqtasyp, jeńilip qaldy.

Altyn úshin aıqasta qos boksshy da aıanyp qalǵan joq. Asa tartysty ótken jekpe-jek qorytyndysynda tóreshiler bir aýyzdan fılıppındik boksshyny jeńimpaz dep tapty.

Osylaısha, fınalǵa shyqqan tórt boksshymyzdyń ekeýi altynǵa synyq súıem qalǵanda súrinip, kúmisti qanaǵat tutty.

Esterińizge sala ketsek, Ábilhan Amanqul keshe jartylaı fınalda Qytaı eliniń namysyn qorǵap júrgen, sol elde turatyn qandasymyz Tańathan Toqtarbekti utyp, fınalǵa joldama alǵan bolatyn.

Endi, «altyn» medal úshin sharshy alańǵa shyǵatyn eki boksshymyz qaldy. Olar - 81 keli salmaqta Bekzat Nurdáýletov pen 91 keli salmaqta synǵa túsetin Vasılıı Levıt.

Aıta ketsek, osyǵan deıin 63 keli salmaqta Zákir Safıýllın kúmis medal jeńip alǵanyn jazǵan bolatynbyz.