Bokstan Olımpıadaǵa irikteý týrnıri: Búgin sharshy alańǵa kimder shyǵady

NUR-SULTAN. QazAqparat – Búgin Iordanııanyń Amman qalasynda ótip jatqan bokstan Olımpıalyq irikteý týrnırinde erler arasynda úsh qazaqstandyq synǵa túsedi, dep habarlaıdy QazAqparat tilshisi.

Atap aıtar bolsaq, kúndizgi sessııada 63 keli salmaqta el namysyn qorǵaıtyn Zákir Safıýllın jáne 81 keli salmaqta synǵa túsetin Bekzad Nurdáýletov sharshy alańǵa shyǵady. Al keshki sessııada 75 keli salmaqta Ábilhan Amanqul Olımpıada joldamasyna talasty bastaıdy.

Kúndizgi sessııa Nur-Sultan ýaqytymen saǵat 15:00-de, keshki sessııa 21:00-de bastalady.

Zákir Safıýllın qytaılyq Jang Shanmen kezdesse, 81 kelidegi Bekzad Nurdáýletov Jańa Zelandııa ókili Jerom Pompellonege qarsy shyǵady. Al Ábilhan Amanqul Ońtústik Koreıa ókili Kım Jınjııamen kezdesedi.

Esterińizge sala keteıik, keshe áıelder boksynan sharshy alańǵa shyqqan qazaqstandyq eki sportshy qarsylastaryna jol berip, joldamadan tys qaldy.

Týrnırde Olımpıada oıyndaryna barlyǵy 63 lıtsenzııa úlestiriledi.

Qazaqstan quramasy sapynan Azııa-Tynyq muhıty aımaǵy elderiniń irikteý týrnırine erlerden 8 salmaq, áıelderden 5 salmaq sanatynda jalpy 13 boksshy synǵa túsedi. Atap aıtqanda, erlerden 52 keli salmaqta Sáken Bıbosynov, 57 kelide Serik Temirjanov, 63 keli salmaqta Zákir Safıýllın synǵa tússe, qazaqtyń «salmaǵy» atanyp ketken 69 kelide Abylaıhan Júsipov el namysyn qorǵaıdy. Al 75 keli salmaq sanatynda Ábilhan Amanqul, 81 kelide Bekzad Nurdáýletov, 91 keli salmaqta Vasılıı Levıt Olımpıada joldamasyna talasady.

Áıelder boksynan 51 kelide Angelına Lýkas, 57 kelide Dámetken Kelimbet sharshy alańǵa shyǵady. 60 keli salmaqta Rımma Volosenko, 69 kelide Valentına Halzova synǵa tússe, 75 keli salmaqta Nadejda Rıabets judyryqtasady.