Bokstan Qazaqstan ulttyq quramalarynyń bas bapkerleri aýysty
Qazaqstan boks federatsııasy málim etkenindeı, erler quramasyna bas bapker bolyp Qaırat Satjanov bekitildi.
Ol 2018 jyldan beri basshylyq etken Ǵalymbek Kenjebaevty almastyrdy.
Osy kezeńde qazaqstandyq boksshylar 2019 jylǵy álem chempıonatynda 6 medalǵa (1 altyn, 1 kúmis, 4 qola) qol jetkizdi.
2021 jylǵy Azııa chempıonatynan 5 kúmis, 1 qolamen oraldy. Tokıoǵa tolyq qurammen baryp, bylǵary qolǵap sheberleri tek eki qola júldeni qanaǵat etti.
Q.Satjanovtyń bapkerlik ótili – 31 jyl. 2011-2019 jyldary Qazaqstan jasóspirimder quramasynyń aǵa bapkeri boldy. 2019 jyly Qaırat Tursynqanuly jastar quramasynyń aǵa bapkerligine bekitildi.
Osy eki jylda onyń shákirtteri Azııa chempıonattarynda komandalyq esepte (2019 jyly – 6 altyn, 1 kúmis, 2 qola), 2021 jyly – 8 altyn, 2 kúmis, 2 qola) úzdik shyqty.
Sondaı-aq 2021 jylǵy dúnıejúzilik birinshilikte ekinshi orynǵa (2 altyn, 2 kúmis, 1 qola) ıe boldy.
Qazaqstan áıelder quramasynda Erik Alǵabektiń ornyna bas bapker bolyp Shamıl Safıýllın keldi.
E.Alǵabek komandaǵa 2 jyl jetekshilik etti. Osy kezeńde áıelder quramasy 2019 jylǵy álem chempıonatynda 2 qola júldeni, 2020 jyly Azııa irikteý týrnırinde bir olımpıada joldamasyn enshiledi. 2021 jylǵy Azııa chempıonatynda komandalyq esepte (8 altyn, 1 kúmis, 1 qola) top jardy.
Sh.Safıýllın shırek ǵasyr boıy bapkerlik etip keledi.
Osy ýaqyt ishinde Qazaqstanda jáne shetelde jumys jasap, álem birinshiliginde júlde alǵan, Azııada ozyp shyqqan shákirtter daıyndady. 2018 jyldan beri Shamıl Abdýlbarıuly Qazaqstan áıelder ulttyq quramasynyń aǵa bapkeri boldy.