Bokstan Qazaqstan chempıonatynyń ekinshi kúni qalaı ótti

ShYMKENT. QazAqparat – Shymkentte bokstan ótip jatqan el chempıonatynda 24 qarashada 57, 63, 69 kelige deıingi salmaqtaǵy boksshylar úzdik segizdikke iliný úshin sharshy alańǵa shyqsa, al 91+ salmaqtaǵylar shırek fınalǵa shyǵý úshin aıqasty, dep habarlaıdy QazAqparat.

Chempıonattyń búgingi aıqastarynyń biri – 69 keli salmaqta mańǵystaýlyq Sanatáli Tóltaev pen pavlodarlyq Qýan Qýatovtyń arasyndaǵy jekpe-jek boldy. Tóltaev 2018 jyly bir ret el chempıonatynda top jarǵan. Fınalda ol tájirıbeli ári birshama júldege ilingen Bekdáýlet Ibragımovpen basty júldeni sarapqa salǵan edi. Biraq bul joly ol myqty qarsylastardyń biri Qýan Qýatovpen kezdesti. Áıtse de chempıon súringen joq – tóreshiler oǵan birinshi jáne úshinshi raýndtyń jeńimpazy dep tanydy. Artynsha pavlodarlyq boksshy Qýatov Almatydan kelgen Asan Erýbekpen qolǵap túıistiredi. «Qazaqtyń oń jambasyndaǵy» salmaqta basty úmitker retinde Abylaıhan Júsipov pen Aslanbek Shymbergenov kele jatyr. Ózderiniń reıtıngteriniń arqasynda olar bastapqy kezeńdegi aıqastarǵa qatyspaıdy.

Shırek fınalda qyzdar arasynda 54 kelige deıingi salmaqta Dına Jolaman men Rano Parhatova kezdesti. Týrnırlik setkada Dámetken Kelimbet pen Balaýsa Muzdymannyń da reıtıngi jaman emes. Al qyzdar arasynda 69 keli salmaqta Olımpıada júldegeri Darıǵa Shákimovaǵa qarsy nursultandyq Ásel Quspanova shyǵatyn boldy. Al chempıon Valentına Halzovaǵa qarsy Qyzylorda oblysynan Qýanysh Býrhan sharshy alańǵa shyǵady. Aldyńǵy kezeńde Qýanysh almatylyq Dınar Satybaldymen qolǵap túıistergen bolatyn.

25 qarashada sharshy alańda Shákimova men Halzova ózara myqtyny anyqtaıdy. Al erler arasynda reıtıngteri joǵary boksshylar óner kórsetedi.

Chempıonattyń úshinshi kúninde Zákir Safıýllınge qarsy Álı Aqedilov (Shyǵys Qazaqstan), Ádilhan Amanqulǵa qarsy qaraǵandylyq Ersultan Sovetov, Erik Áljanovqa qarsy mańǵystaýlyq Marat Qasaev (Shyǵys Qazaqstan) kezdesý ótkizedi.