Bokstan Qazaqstan chempıonaty: Valentına Halzova olımpıada júldegerin utty

NUR-SULTAN. QazAqparat – Shymkent qalasynda áıelder arasyndaǵy bokstan Qazaqstan chempıonatynyń fınalynda 69 kg salmaqta Darıǵa Shákimova men Valentına Halzova sharshy alańǵa shyqty, dep habarlaıdy QazAqparat tilshisi.

Bulardyń ekeýi de – Qazaqstannyń eńbek sińirgen sport sheberi, bir-birin jaqsy biletin syralǵy qarsylastar.

Darıǵa Rıo olımpıadasynyń qola júldegeri, 32 jasta bolsa, bıyl 23-ke tolǵan Valentına – 2016 jylǵy álem chempıony.

V.Halzova buǵan deıin Iordanııada olımpıada joldamasy úshin ótken týrnırde óz múmkindigin paıdalana almaǵan edi.

Bul joly jeńis tóreshilerdiń sheshimimen biraýyzdan Valentına Halzovaǵa berildi.

V.Halzova da aldaǵy basty maqsaty Tokıo olımpıadasynyń joldamasyn jeńip alý ekendigin málimdedi.

Taǵy bir olımpıadalyq salmaq – 60 kelide elordalyq Rımma Volosenko qazylardyń biraýyz sheshimimen aqmolalyq Karına Ibragımovadan basym tústi.

64 kg salmaqta qaraǵandylyq Mılana Safronova shymkenttik Laýra Esengeldini merziminen buryn, aıqyn basymdyqpen utty.

Eske sala keteıik, budan buryn fınalǵa shyqqan boksshylardyń anyqtalǵanyn, Nazym Qyzaıbaıdyń Tokıo olımpıadasynyń joldamasyn jeńip alǵysy keletinin jazǵan bolatynbyz.