Bokstan Qazaqstan birinshiliginde Nazym Qyzaıbaı fınalǵa shyqty

<p>ASTANA. KAZINFORM &mdash; Qaraǵandy qalasynda ótip jatqan eresekter arasyndaǵy Qazaqstan birinshiliginde fınalǵa shyqqan birqatar boksshy anyqtaldy.</p>

Erler arasynda 48 keli salmaqta 2021 jylǵy álem chempıony Temirtas Júsipov jartylaı fınalda túrkistandyq Nurǵısa Turabekovti 5:0 esebimen jeńdi.

Endi ol fınalda Jambyl oblysynan kelgen Nurzat Ońǵarovpen sheberlik baıqasady.
Al qyzdar arasynda qos dúrkin álem chempıony, 2024 jylǵy Olımpıada oıyndarynyń qola júldegeri Nazym Qyzaıbaı (48 keli) jartylaı fınalda Ánel Qudaıbergendi (Jetisý oblysy) tize búktirdi. Onyń fınaldaǵy qarsylasy — Aqbota Bolat (Qyzylorda oblysy).
Sondaı-aq qos dúrkin Azııa chempıony jáne álem chempıonatynyń birneshe dúrkin júldegeri Alýa Balqybekova (50 keli) jartylaı fınalda Gúlnaz Bóribaevanyń (Qaraǵandy oblysy) osal tusyn tapty. Endi ol fınalda Gúlnar Turapbaımen (Qaraǵandy oblysy) kezdesedi.
El birinshiliginde qos dúrkin Azııa chempıony, álem chempıonatynyń kúmis jáne qola júldegeri Jaına Shekerbekova (54 keli) da jartylaı fınalda Symbat Álıaskardy (Jambyl oblysy) jeńip, fınalda Elına Bazarovamen (Shymkent) kezdesetin boldy.
El birinshiliginde 60 kelide Serik Temirjanov (Pavlodar oblysy) jartylaı fınalda Shyńǵys Mýsınovtan (Aqmola oblysy) basym tússe, endi ol fınalda Talǵat Syrymbetovpen (Qaraǵandy oblysy) sheberlik baıqasady.

Aıta ketsek, búgin el birinshiliginde jartylaı fınal bastaldy.