Bokstan bas bapker: Basty maqsatymyz Olımpıadada kemi 3-4 medal alý

NUR-SULTAN. QazAqparat - Búgin Tokıo Olımpıadasyna sportshylarymyzdyń alǵashqy legi attandy. Atap aıtsaq, boks, dzıýdo, karate, ústel tennısi, jeńil atletıka jáne atý sporttarynyń ókilderi men otandyq sport salasynyń mamandary bastaǵan alǵashqy lek attanyp barady. Osy oraıda QazAqparat bokstan Ulttyq quramanyń bas bapkeri Ǵalymbek Kenjebaevqa telefon arqyly habarlasyp, qandaı daıyndyqpen, qansha medal alýdy josparlanǵany týraly surap bildi.

- Ǵalymbek Qalıuly, búgin Tokıo Olımpıadasyna attanyp bara jatsyzdar, daıyndyqtaryńyz qalaı?

- Óte jaqsy daıyndyqpen attanyp bara jatyrmyz. Dál qazir áýejaıda reıstiń ushqanyn kútip otyrmyz. Boksshylardyń da kóńilkúıi jaqsy. Basty maqsatymyz - burynǵy dástúr boıynsha kemi 3-4 medal alý.

- Naqtyly aıta ketseńiz, «dástúr boıynsha» dep atap kettińiz. «Qazaq salmaǵy» atanyp ketken 69 keli salmaqtan bıyl da altyn kútemiz be?

- Tek bir salmaqtan ǵana emes, barlyq salmaqtan júlde alýǵa tyrysamyz. Tokıoǵa bara jatqan barlyq boksshylar jeńis tuǵyryna shyǵýǵa kúsh salatyn bolady. Tek jerebe joldas, sáttilik serik bolsa bolǵany.

- Dese de, 69 keli salmaqta el namysyn qorǵaıtyn Abylaıhan Júsipovke dástúrdi jalǵaý mindeti artylǵan bolar?

- Árıne, Abylaıhan «altyn dástúrdi» ary qaraı jalǵaıdy dep úmittenemiz. Barlyq boksshylarǵa artylǵan mindet birdeı. Ol - jeńis tuǵyrynan kóriný. Almatyda sońǵy jattyǵýymyzdy sátti aıaqtadyq. Tehnıkalyq, fızıkalyq jaqtan tolyqtaı daıyndyqtan óttik. Tokıoǵa da bir apta ýaqyt buryn ketip bara jatyrmyz. Endi, sol jaqta sheberligimizdi shyńdap, jergilikti klımatqa úırenisemiz.

- Tokıoda birinshi bolyp rıngke kimder shyǵady?

- Ony jerebe belgileıdi. 22 shilde kúni jerebe tartý rásimi ótedi. Naqtyly sol kúni kim birinshi Olımpıadany bastaıtynyn estıtin bolasyzdar. Jalpy Olımpıadada eń uzaq ýaqyt synǵa túsetin boksshylar bolady. Bizdiń boksshylar jarysty 24 shilde bastap, 8 tamyz kúni, ıaǵnı Olımpıadanyń aıaqtalatyn sońǵy kúni eń aýyr salmaqtaǵy boksshylar synǵa túsedi. Biz barlyq salmaqtan tolyq quramda ketip bara jatymzy. Buıyrsa sońǵy kúnge deıin sharshy alańǵa shyǵamyz degen úmittemiz.

- Áńgimeńizge rahmet!