Bokstan Azııa chempıonaty: Qazaqstandyq sportshynyń qarsylasy rıngke shyqpaı qoıdy

NUR-SULTAN. QazAqparat - Bokstan Azııa chempıonatynda búgin alǵashqy jekpe-jegin ótkizgen tórt qazaqstandyq sportshynyń ekeýi jarysty jalǵastyrady, dep habarlaıdy QazAqparat tilshisi.

Qurlyqtyq dodada Zakır Safıýllın (64 keli) sharshy alań tórindegi alǵashqy kezdesýinde qarsylasynan basymdyq tanytty. Ol ırandyq Ashkan Rezaıdyń osal tusyn tapty.

Al Ábilhan Amanqul (75 keli) jekpe-jek ótkizbesten jarystyń kelesi satysyna joldama aldy. Ol búgin kýveıttik Saıd Abass Al-Bahranımen sheberlik baıqasýy qajet bolatyn. Qarsylasy sharshy alańǵa shyǵýdan bas tartty.

Qazaqstandyq Mahmýd Sabyrhan (56 keli) men Serik Temirjanov (60 keli) qarsylastaryna ese jiberip, jarys jolynan shyǵyp qaldy.

Eske salsaq, Azııa chempıonaty Birikken Arab ámirliginiń Dýbaı qalasynda 24 mamyrda bastalyp, 31 mamyrǵa deıin jalǵasady. Qurlyqtyq dodada elimizdiń jigitter men qyzdar quramalary baq synaýda.