Bokstan Azııa chempıonaty: Búgin erlerden 12 qazaqstandyq 1/2 fınalǵa shyǵady

ASTANA. QazAqparat – Iordanııa astanasy Amman qalasynda bokstan ótip jatqan Azııa chempıonatynyń jartylaı fınalynda búgin 12 qazaqstandyq sportshy óner kórsetedi, dep habarlaıdy QazAqparat tilshisi.

Kúndizgi sessııa Astana ýaqytymen saǵat 16.00-de bastalady.

Qazaqstandyqtardan alǵashqy bolyp 48 kelige deıingi salmaqta Sanjar Táshkenbaı shyǵady. Ol ekinshi jupta Úndistan úzdigi Govınd Kýmar Sahanımen bokstasady.

Іle-shala Mahmýd Sabyrhan (54 kg) ózbekstandyq Shahzod Mýzafarovpen fınaldyń joldamasy úshin aıqasady.

Besinshi jupta Samatáli Tóltaev (60 kg) sharshy alańnyń ıesi Mohammad Abý Djadjehpen judyryqtasady.

Sondaı-aq Dýlat Bekbaýov (67 kg) taǵy bir ózbekstandyq Asadhýdja Mýıdınhýdjaevtan, Nurqanat Raıys (75 kg) ırandyq Seıedshahın Mýsavıdan, Saǵyndyq Toǵambaı (86 kg) ıordanııalyq Odaı Rııad Adealhındavıden, Qamshybek Qońqabaev asa aýyr salmaqta tájikstandyq Mýhammad Abrorıdınovtan aılasyn asyrýǵa tyrysyp kórmek.

Keshki sessııa saǵat 21.00-de qos álem chempıony Sáken Bıbosynov pen japonııalyq Tomoıa Tsýboıdyń (51 kg) jekpe-jegimen bastalady.

Serik Temirjanov (57 kg) úndistandyq Hýssam Ýddın Mohammedpen, ulttyq qurama kapıtany Aslanbek Shymbergenov (71 kg) mońǵolııalyq Bıamberden Otgonbaatarmen qolǵap túıistiredi.

Budan keıin el quramasyndaǵy aǵaıyndylarǵa kezek keledi. Nurbek Oralbaı (80 kg) ıordanııalyq Hýsseın Eıshaısh Iashaıshpen, Aıbek Oralbaı (92 kg) ırandyq Týfan Sharıfımen sheberlik baıqasady.