Bokstan Azııa chempıonaty: Beıbarys Jeksen júldege qol sozym jerde toqtady

<p>ASTANA. KAZINFORM &ndash; Taıland koroldiginiń Chıangmaı qalasynda bokstan erler jáne áıelder arasynda ótip jatqan Azııa chempıonatynda Beıbarys Jeksen shırek fınaldyq jekpe-jegin ótkizdi.</p>

Alǵashqy básekesinde 60 kelige deıingi salmaqta ózbekstandyq Dılshod Abdýmýrodovty joldan taıdyrǵan qazaqstandyq boksshy bul joly tájikstandyq Akmal Ýbaıdovpen judyryqtasty.

A.Ýbaıdov 2021 jyldan beri kásipqoı boksta óner kórsetip, bes birdeı qarsylasyn merziminen buryn jeńgen. 

Birinshi raýndta 3:2 esebimen tájikstandyq sportshy alǵa shyqty. Ekinshi kezeńde tóreshiler jeńisti túgeldeı A.Ýbaıdovqa berdi. Qorytyndy nátıje ózgere qoıǵan joq.

Osylaısha, B.Jeksen Qazaqstan erler quramasynan birinshi bolyp jarys jolynan shyǵyp qaldy.

Buǵan deıin áıelder arasynda Alýa Balqybekova men Symbat Álıasqar sátsizdikke tap bolǵan edi.

Eske sala keteıik, budan buryn bokstan Azııa chempıonatynda beısenbi kúni Qazaqstan namysyn 6 sportshy qorǵaıtynyn jazǵan bolatynbyz.

Sondaı-aq Azııa chempıonatynda Orazbek Asylqulov sharshy alań ıesin qapy qaldyrdy.

O.Asylqulov 8 jeltoqsan kúni fınalǵa shyǵý úshin mońǵolııalyq Lýndaa Gantýmýrmen talasady.