Bokstan áıelder quramasy Qytaıda ótetin Azııa oıyndaryna attandy

ASTANA. QazAqparat – Bas bapker Shamıl Safıýlın bastaǵan bokstan Qazaqstan áıelder quramasy alǵashqylardyń biri bolyp Qytaıda ótetin kezekti Jazǵy Azıadaǵa attanyp ketti, dep habarlaıdy QazAqparat tilshisi.

Qazaqstan boks federatsııasynan málim etkendeı, Hanchjoýdaǵy Jazǵy Azııa oıyndary qarsańynda qazaqstandyq burymdy boksshylar jergilikti sportshylarmen birikken oqý-jattyǵý jıynyn ótkizedi.

«Qazaqstan boks federatsııasynyń prezıdenti Keńes Raqyshev áýejaıǵa arnaıy kelip, ulttyq qurama múshelerin shyǵaryp saldy. Basty maqsat - qazaq boksynyń úzdik ekenin taǵy bir márte kórsetip, medaldar men Parıj-2024 Olımpıadasynyń lıtsenzııalar ıelený», - delingen federatsııa taratqan málimette.

Sonymen qatar, QBF Prezıdentiniń jeke qarajatynan syıaqy berý dástúri jalǵasa beretini belgili boldy.

Altyn medal úshin chempıondar 50 myń AQSh dollaryn, kúmis júldegerler - 30 myń AQSh dollaryn, qola medal úshin - 10 myń AQSh dollaryn alady.

Qytaı sharshy alańynda el namysyn qorǵaıtyn burymdy boksshylar tizimi:

50 keli - Nazym Qyzaıbaı

54 keli - Jaına Shekerbekova

57 keli - Karına Ibragımova

60 keli - Rımma Volosenko

66 keli - Natalıa Bogdanova

75 keli - Valentına Halzova.

Esterińizge sala keteıik, XIX Jazǵy Azıada 23 qyrkúıek pen 8 qazan aralyǵynda Qytaıdyń Hanchjoý qalasynda ótedi.

Qazaqstan quramasynan 500-den astam sportshy sporttyń 33 túrinen synǵa túsedi.

Azııa oıyndarynda fınalǵa jetken boksshylar medaldardan bólek Olımpıada oıyndaryna joldama alady.