Bokstan álem chempıony Mereı Aqshalov jaýapty qyzmetke taǵaıyndaldy

<p>ASTANA. KAZINFORM &ndash; Bokstan álem chempıony Mereı Aqshalov Astana qalasyndaǵy Q. Muńaıtpasov atyndaǵy olımpıada rezerviniń respýblıkalyq mamandandyrylǵan mektep-ınternat-kolledjine dırektor bolyp taǵaıyndaldy.</p>

Atalǵan oqý orny atap ótkendeı, Qazaqstan Respýblıkasy Týrızm jáne sport mınıstrligi Sport jáne dene shynyqtyrý isteri komıteti tóraǵasynyń orynbasary Serikov Rollan Serikuly, mekeme qyzmetkerlerin tóraǵa buıryǵymen tanystyryp, Aqshalov Mereı Tólegenuly osy laýazymǵa taǵaıyndalǵanyn málimet etti.

Foto: Q. Muńaıtpasov atyndaǵy olımpıada rezervi

 

Esterińizge salsaq, sý jańa basshy osy mekteptiń 2005 jylǵy túlegi, boks bóliminiń nusqaýshy-sportshysy.

Mereı Aqshalov 1988 jyly 8 mamyrda Aıagóz qalasynda (qazirgi Abaı oblysy) dúnıege keldi. Qazaqstan Respýblıkasyna eńbegi sińgen sport sheberi. 2013 jylǵy Álem chempıony, Azııa chempıony. 2010 jylǵy Áskerıler arasyndaǵy Álem chempıony. 2013 jylǵy Azııa qurlyǵynyń eń úzdik boksshysy. 2013 jylǵy Qazaqstannyń «Jyl sportshysy». 2008 jylǵy Olımpıada oıyndarynyń qatysýshysy. Sporttyq mansabynda 60 jáne 64 kelige deıin salmaq dárejesinde judyryqtasty.

«Qurmet» ordenimen marapattaldy.

Eńbek jolyn Astana qalasynyń dene shynyqtyrý jáne sport basqarmasynyń balalar men jasóspirimder sport mektebiniń ádiskeri bolyp bastady. Keıin, qalalyq joǵarǵy sporttyq sheberligi mektebi, sport mektebi dırektorynyń orynbasary, dırektory bolyp jalǵastyrdy.

QR Ulttyq Olımpıada Komıtetinde, Aqmola oblysy dene shynyqtyrý jáne sport basqarmasy bastyǵynyń orynbasary laýazymdyq qyzmetterin atqardy. Aqmola oblysy Shortandy aýdany ákiminiń orynbasary boldy.

Sońǵy jumys orny - QR Týrızm jáne sport mınıstrligi, sport jáne dene shynyqtyrý isteri komıteti, sportty damytý dırektsııasynyń bokstan memlekettik jattyqtyrýshy.