Bokstan álem chempıonatynda júldeger bolǵandar 30 myń dollarǵa deıin syıaqy alady

YSTANBUL. QazAqparat - Túrkııanyń Ystanbul qalasyndaǵy álem chempıonatynda júldegerler qatarynan kóringen qazaqstandyq boksshylar qarjylaı syıaqymen marapattaldy, dep habarlaıdy QazAqparat tilshisi.

Bul jóninde Qazaqstan boks federatsııasy málim etti.

Qazaqstan boks federatsııasynyń prezıdenti Keńes Raqyshev elimizdiń sportshylaryn qoldaý maqsatynda Túrkııadaǵy álem chempıonatyna arnaıy keldi.

Sapar barysynda ol otandyq boksty damytýǵa baılanysty sheteldik áriptesterimen birqatar mańyzdy kezdesýler ótkizdi.

Odan keıin qazaqstandyq boksshy Alýa Balqybekovanyń fınaldyq jekpe-jegin tamashalady. Sportshylarmen júzdesýde júldege ilikken jáne bokstyń jarqyn úlgisin kórsetken búkil boksshylarǵa alǵys aıtty.

Aıta keteıik, álem chempıonatynyń qorytyndysy boıynsha júldegerler IBA syıaqysynan bólek Qazaqstan boks federatsııasynyń qarjylaı syıaqysymen marapattalady.

Osylaısha kúmis júldeger Alýa Balqybekovaǵa 30 myń AQSh dollary berilse, qola júldegerler Jaına Shekerbekova, Dına Jolaman, Karına Ibragımova jáne Valentına Halzova 10 myń dollarǵa ıe bolady.