Bokstan álem chempıonatynda Valentına Halzova alǵashqy jeńisine jetti

YSTANBUL. QazAqparat - Túrkııanyń Ystanbul qalasynda bastalǵan áıelder arasyndaǵy bokstan 2022 jylǵy álem chempıonatynda qazaqstandyq Valentına Halzova alǵashqy jeńisine qol jetkizdi, dep habarlaıdy QazAqparat.

El quramasynan Valentına Halzova 70 keli salmaqta kenııalyq Lorna Kýsa Sımbımen qolǵap túıistirdi.

Kenııalyq boksshy Valentınaǵa laıyqty qarsylyq kórsete alǵan joq.

Jekpe-jek barysynda qazaqstandyq sportshy aıqyn basymdyq kórsetti. Nátıjesinde birinshi raýnd aıaqtalmastan tóreshi onyń qolyn kóterdi.

Osylaısha Valentına Halzova jarysty jalǵastyrýǵa múmkindik aldy.

Valentına Halzova 1997 jyly 16 qańtarda dúnıege kelgen. Ol 2016 jyly elordamyzda ótken álem chempıonatynda 69 keli salmaqta chempıon atanǵan bolatyn.

Al 2017 jyly Azııanyń kúmis júldegeri boldy.

Endi 10 mamyrda el quramasynan Alýa Balqybekova (48 keli) kanadalyq Prııanka Dıllonmen jekpe-jek ótkizedi.

Buǵan deıin habarlaǵanymyzdaı, dúbirli dodada elimizdiń atynan 12 boksshy synǵa túsedi.

Olardyń qatarynda Nazym Qyzaıbaı (50 keli), Jaına Shekerbekova (52 keli), Dına Jolaman (54 keli), Karına Ibragımova (57 keli), Rımma Volosenko (60 keli), Aıda Ábikeeva (63 keli), Darıǵa Shákimova (66 keli), Nadejda Rıabets (75 keli), Gúlsaıa Erjan (81 keli) jáne Lázzat Kúngeıbaeva (81 keliden joǵary) bar.

Eske salsaq, qazaqstandyq qalǵan boksshylar endi alǵashqy jekpe-jeginde Kolýmbııa, Pýerto-Rıko, Ispanııa, Fınlıandııa, Aljır, Ózbekstan, Túrkııa jáne Ýkraına boksshylarymen kezdesedi.

Atalǵan týrnır 1974 jyldan beri turaqty túrde uıymdastyrylyp keledi.

Qazaqstan quramasy qazirge deıin barlyǵy 51 medal enshiledi. Olardyń 14-i altyn, 15-i kúmis, 22-i qola.