Bokstan álem chempıonatynda búgin úsh qazaqstandyq rıngke shyǵady

ASTANA. QazAqparat – Úndistannyń Nıý-Delı qalasynda bokstan áıelder arasynda ótip jatqan álem chempıonatynda búgin úsh qazaqstandyq sportshy rıngke shyǵady, dep habarlaıdy QazAqparat tilshisi.

Álem chempıonatynyń júldegerleri Alýa Balqybekova, Jaına Shekerbekova jáne Nadejda Rıabets alǵashqy kezdesýlerin ótkizedi.

Alýa Balqybekova 48 kelige deıingi salmaqta 1/16 fınalda sıngapýrlyq Keı Van Chı Vaımen, Jaına Shekerbekova (54 kg) ońtústikkoreıalyq E Chjı Immen, Nadejda Rıabets (66 kg) taǵy bir koreıalyq boksshy Sen Sýdjınmen judyryqtasady.

Úsheýi de Astana ýaqytymen saǵat 14.30-da bastalatyn kúndizgi sessııada óner kórsetedi.

Álem birinshiligin tikeleı efırde «Qazsport» telearnasynan qaraýǵa bolady.

Osyǵan deıin rıngke shyqqan úsh qazaqstandyq boksshy kelesi kezeńge ótti.

Eske sala keteıik, budan buryn bokstan álem chempıonatynda Jazıra Oraqbaevanyń alǵashqy qarsylasyn nokaýtpen jeńgenin jazǵan bolatynbyz.

Sondaı-aq Rımma Volosenko ózbekstandyq sportshyny jeńdi.

Qarsylasyn nokaýtpen jeńgen Farıza Shóltaı 1/4 fınalǵa shyqty.

Ashyq kózderden alynǵan foto