Bokstan álem chempıonatynda búgin 4 qazaqstandyq qyz rıngke shyǵady

YSTANBUL. QazAqparat - Bokstan áıelder arasyndaǵy álem chempıonatynda búgin, 11 mamyrda qazaqstandyq tórt sportshy sharshy alańǵa shyǵady, dep habarlaıdy QazAqparat.

Álem chempıonatyna elimizdiń atynan 12 boksshy bardy. Olardyń qatarynan ázirge eki boksshy sharshy alańǵa shyǵyp, jarysty jalǵastyrýǵa múmkindik aldy.

Aldymen 8 mamyrda el quramasynan Valentına Halzova (70 keli) kenııalyq Lorna Kýsa Sımbıdi tize búktirdi.

Odan keıin 10 mamyrda Alýa Balqybekova (48 keli) kanadalyq Prııanka Dıllonnan basym tústi.

Endi 11 mamyrda kúndizgi sessııada Jaına Shekerbekova (52 keli) Pýerto-Rıko elinen kelgen Melodı Vargaspen sharshy alańǵa shyqsa, Karına Ibragımova (57 keli) rýmynııalyq Klaýdııa Nechıtamen kezdesedi.

Sondaı-aq, atalǵan sessııada Aıda Ábikeeva (63 keli) aljırlik Imane Helıfpen qolǵap túıistiredi.

Al keshki sessııada Nadejda Rıabets (75 keli) túrkııalyq Býshra Ishıldarmen sharshy alańǵa shyǵady.

El quramasynan aldaǵy kúnderde Nazym Qyzaıbaı (50 keli), Dına Jolaman (54 keli), Rımma Volosenko (60 keli), Darıǵa Shákimova (66 keli), Gúlsaıa Erjan (81 keli) jáne Lázzat Kúngeıbaeva (81 keliden joǵary) synǵa túsedi.