Bokstan álem chempıonaty: Temirtas Júsipov shırek fınalǵa shyqty

BELGRAD. QazAqparat - Serbııa astanasy Belgrad qalasynda ótip jatqan bokstan álem chempıonatynda búgin Temirtas Júsipov alǵashqy jekpe-jegin sátti ótkizdi, dep habarlaıdy QazAqparat tilshisi.

Qazaqstandyq boksshy 48 keli salmaqta 1/8 fınalda serbııalyq Omer Ametovıchpen qolǵap túıistirgen edi.

Jekpe-jek barysynda Temirtas qarsylasynyń osal tusyn tapty. Soqqyny kóbirek jumsap, upaı qoryn molaıtty. Nátıjesinde tóreshilerdiń basym bóligi onyń jeńisine qoldaý bildirdi. Ol 1/4 fınalǵa joldama aldy.

Aıta ketsek, budan buryn Mahmýd Sabyrjan (54 keli), Samatáli Tóltaev (60 keli), Aslanbek Shymbergenov (71 keli), Nurqanat Raıs (75 keli), Aıbek Oralbaı (92 keli) jarysty jalǵastyrýǵa múmkindik aldy.

Al Bek Nurmaǵambet (86 keli) pen Nurlan Saparbaı (92 keli) qarsylastaryna jol berdi.

Sondaı-aq, búgin kúndizgi sessııada Nurbek Oralbaı (80 keli) brazılııalyq Isaıas Fılomen sharshy alańǵa shyǵady.

Al keshki sessııada Sanatáli Tóltaev (63,5 keli) moldovalyq Vasılıı Chebotarmen kezdesedi.