Bokstan álem chempıonaty: Qazaqstandyq eki sportshy jarysty jalǵastyrady

NUR-SULTAN. QazAqparat - Polshanyń Keltse qalasynda ótip jatqan jastar arasyndaǵy álem chempıonatynda 4 qazaqstandyq boksshy kezekti jekpe-jegin ótkizdi, dep habarlaıdy QazAqparat Qazaqstan boks federatsııasyna silteme jasap.

Olardyń arasynda ekeýi jeńiske jetse, ekeýi qarsylastaryna ese jiberip qoıdy.

Dúbirli dodada 52 kelide synǵa túsken Kenje Muratuly ózbekstandyq qarsylasy Shahzod Muzafarovtan jeńildi. Ol budan buryn shotlandııalyq Lennon Malllıgannan basym túsken edi.

Al 60 kelide sharshy alańǵa shyqqan Elnur Súıinbaı nıkaragýalyq Mıkel Ernandesti úshinshi raýndta nokdaýnmen tize búktirdi. Osylaısha 1/8 fınalǵa joldama aldy.

Taǵy bir qazaqstandyq Nurjan Amangeldiniń (69 keli) reseılik Cheerav Ashalaevqa shamasy kelgen joq. Qarsylasy – Eýropa chempıonatynda kúmis júldeger atanǵan tájirıbeli boksshy.

Al qyzdar arasynda 54 keli óner kórsetken Aıshagúl Eleýbaeva 1/4 fınalǵa shyqty. Úndi boksshysymen ótken jekpe-jekti tóreshiler ekinshi raýndta toqtatyp, jeńisti qazaqstandyq sportshyǵa berdi.

Esterińizge sala ketelik, jastar arasyndaǵy álem chempıonatyna elimiz atynan 20 boksshy attanǵan bolatyn.