Bokstan álem chempıonaty: Qamshybek Qońqabaev búgingi jeńisi jóninde pikir bildirdi

TAShKENT. QazAqparat - Ózbekstan astanasy Tashkent qalasynda ótip jatqan álem chempıonatynyń tórtinshi jarys kúninde jeńiske jetken Qamshybek Qońqabaev (92 keliden joǵary) jekpe-jegi jóninde pikir bildirdi, dep habarlaıdy QazAqparat tilshisi.

4 mamyrda Qamshybek Qońqabaev (92 keliden joǵary) reseılik Alekseı Dronovty nokaýtqa jiberip, jarystyń kelesi satysyna shyqqan bolatyn.

«Alǵashqy jekpe-jegimdi sátti ótkizdim. Bapkerler quramynyń úıretkenin óz deńgeıinde oryndap, jeńiske jettim. Aldaǵy jekpe-jegimde de osyndaı jeńisimdi jalǵastyrsam degen oıdamyn. Oǵan bar kúshimdi salamyn. Zal ishinen jankúıerler qoldaýyn sezindim. Olardyń sany az bolǵan joq. Sondaı-aq, maǵan qoldaý bildirgen barsha jankúıerlerge alǵysymdy bildiremin», - dedi ol.

Sondaı-aq, el quramasynan búgin Sanatálı Tóltaev (63,5 keli) 1/16 fınalda Mavrıkıı elinen kelgen Rısharno Kolınge ese jiberdi.

Sondaı-aq, el quramasynan 3 mamyrda Talǵat Syrymbetov (60 keli) qarsylasyna ese jiberip, jarys jolynan shyǵyp qaldy.

Al Aıbek Oralbaı (92 keli) jáne Saǵyndyq Toǵambaı (86 keli) alǵashqy jekpe-jeginde jeńiske jetti.