Bokstan álem chempıonaty: Eki qazaqstandyq boıjetken fınalǵa shyqty

NUR-SULTAN. QazAqparat - Polshanyń Keltse qalasynda ótip jatqan jastar arasyndaǵy álem chempıonatynda qazaqstandyq bes boksshy qyzdyń ekeýi fınalǵa joldama aldy, dep habarlaıdy QazAqparat Qazaqstan boks federatsııasyna silteme jasap.

Jartylaı fınalda Juldyz Shaıahmetova (60 keli) ózbekstandyq Dılfýza Bekovany qapy qaldyryp ketti. Al Dana Dıdaı (75 keli) da ózbek bokshysy Sohıba Rýzmetovanyń osal tusyn tapty. Osylaısha eki qazaqstandyq sportshy endi fınalda baq synaıdy.

Al qazaqstandyq úsh boksshy jartylaı fınald súrindi. Atap aıtqanda, Jasmın Qzızatova (69 keli) polshalyq Base Martsınkovskaıaǵa, Ásel Saǵatova (81 keli) moldovalyq Ksenııa Olıfırenkoǵa, Eldana Tálipova (81 keliden joǵary) da moldovalyq Darıa Kozorezge ese jiberdi. Nátıjesinde atalǵan úsh boksshy qola júldeger atandy.

Al jigitter arasynda ázirge Sanjar Táshkenbaı (49 keli) fınalǵa joldama aldy.

Esterińizge sala ketelik, jastar arasyndaǵy álem chempıonatyna elimiz atynan 20 boksshy attanǵan bolatyn.