Bokstan álem chempıonaty: búgin qazaqstandyq bes boksshy synǵa túsedi

ASTANA. QazAqparat - Ózbekstan astanasy Tashkent qalasynda ótip jatqan álem chempıonatynda búgin, 9 mamyrda el quramasynan bes boksshy rıngke shyǵady, dep habarlaıdy QazAqparat tilshisi.

Elorda ýaqytymen saǵat 15:00-de bastalatyn kúndizgi sessııada Aslanbek Shymbergenov (71 keli) A rınginde segizinshi jupta Izraıl ókili Mıroslav Kapýlerom-Işenkomen kezdesse, Nurbek Oralbaı (80 keli) B rınginde on birinshi jekpe-jekte túrkııalyq Kaan Aıkýtsýnmen sharshy alańǵa shyǵady.

Al, 19:00-de bastalatyn keshki sessııada A rınginde qazaqstandyq úsh boksshy synǵa túsedi. Alǵashqy jupta Mahmýd Sabyrhan (54 keli) úndistandyq Sachın Sıvachpen, jetinshi jupta Dýlat Bekbaýov (67 keli) úndistandyq taǵy bir boksshy Akash Sangvanmen kezdesedi.

Sondaı-aq, on ekinshi jupta Nurqanat Raıys (75 keli) brazılııalyq Vanderleı Pereıramen sheberlik baıqasady.

Eske salsaq, 8 mamyrda Sanjar Táshkenbaı Tashkentte ózbekstandyq boksshyny nokdaýnmen jeńdi.