Bokstan ÁCh: Úzdik qazaqstandyq jankúıer Abý Joldasovqa 3 myń AQSh dollary syılandy

ASTANA. QazAqparat - Tashkentte ótken bokstan álem chempıonatynda qazaqstandyq boksshylarǵa erekshe jankúıerlik qylǵan Abý Joldasov 3 myń AQSh dollarynyń sertıfıkatymen marapattaldy, dep habarlaıdy QazAqparat.

Qazaqstan boks federatsııasynyń prezıdenti Keńes Raqyshev Feısbýktegi paraqshasynda, boks janashyrynyń kózge túsken sátin atap ótti.

«Tashkenttegi álem chempıonaty kezinde qolynda barabany bar qazaqstandyq jankúıerdi búkil álem kórdi. Ol qazaq boksynyń eń belsendi jankúıeri - Abý Joldasov.

Abý Jańaózende týǵan. 2011 jyldan beri el boksshylaryna jankúıerlik qylyp, barlyq álem chempıonattaryna barǵan.

Ózbekstan astanasyndaǵy bokstan álem birinshiliginiń erekshe bolatynyn bilgen ol, Tashkentte qazaq boksynyń naǵyz fan-klýbyn uıymdastyrǵan jáne trıbýnadaǵy jankúıerlerdiń áreketin úılestire, basqara bilgen» dep jazdy Keńes Raqyshev.
Osy sebepti boksshylardy, jattyqtyrýshylardy jáne chempıondardyń analaryn marapattaý rásiminde Abý Joldasov eń qurmetti qonaqtardyń biri boldy. Keńes Raqyshevtiń arnaıy shaqyrýymen kelgen Abý Joldasovqa qurmet kórsetildi.

«Bul búkil qazaqstandyq jankúıerlerge alǵys aıtý nyshany desek bolady! Abý Joldasov boksshylar, bapkerler jáne jýrnalısterdiń qoshemetine bólenip qana qoımaı, 3 myń AQSh dollary kólemindegi aqshalaı sertıfıkatpen marapattaldy!», - dep jazdy Qazaqstan boks federatsııasynyń prezıdenti.

Kezdesý sońynda qazaq boksynyń basty jankúıeri Abý Joldasov pen Federatsııa basshysy Keńes Raqyshev jyly áńgimelesip, Hanchjoý Azııa oıyndary men Parıjdegi Olımpıada oıyndaryna josparlarymen bólisti.