Bokstan ÁCh: Rımma Volosenko ózbekstandyq sportshyny jeńdi

ASTANA. QazAqparat – Úndistannyń Nıý-Delı qalasynda bokstan áıelder arasynda ótip jatqan álem chempıonatynda Rımma Volosenko bastapqy kezdesýin sátti ótkizdi, dep habarlaıdy QazAqparat tilshisi.

Rımma Volosenko 60 kelige deıingi salmaqta ózi sııaqty Azııa chempıony, ózbekstandyq Sıtora Turdybekovamen judyryqtasty.

2022 jyly Ystanbul qalasynda ótken dúnıejúzilik dodada R.Volosenko alǵashqy aınalymda-aq aǵylshyn qyzy Shona Ýıtýelden jeńilip qalǵan edi.

Bul joly birinshi raýndta bes tóreshiniń úsheýi ózbekstandyq boksshy basym dep tapty. Ekinshisinde Rımma tarazy basyn ózine aýdardy. Biraq ol úshinshi raýndta eskertý alyp qaldy. Degenmen qazylar jeńisti Rımma Volosenkoǵa berdi.

R.Volosenkonyń kelesi qarsylasy – armenııalyq Elıda Kocharıan.

Búgin sondaı-aq Qazaqstannan Farıza Sholtaı 81 kelige deıingi salmaqta Trınıdad jáne Tobago eliniń ókili Lıenn Býdremmen rıngke shyǵady.

Eske sala keteıik, budan buryn bokstan álem chempıonatynda Jazıra Oraqbaevanyń alǵashqy qarsylasynan nokaýtpen jeńgenin jazǵan bolatynbyz.