Bokstan ÁCh: Qazaqstan 80 paıyzǵa jańarǵan qurammen barady

NUR-SULTAN. QazAqparat – Qazaqstan boks federatsııasynyń bapkerlik máseleler jónindegi vıtse-prezıdenti, bokstan QR quramasynyń memlekettik jattyqtyrýshysy Baqtııar Artaev bokstan ulttyq qurama 80 paıyzǵa jańaratynyn aıtty, dep habarlaıdy QazAqparat tilshisi.

Ortalyq kommýnıkatsııalar qyzmetinde bıyl kúzde bokstan ótetin álem chempıonatyna baratyn ulttyq quramy týraly suraq qoıyldy.

«Qazir ulttyq quramadan eshkim de ketpedi. Biraq ulttyq quramanyń Olımpıadaǵa (Tokıoǵa) barǵan quramy 80 paıyzǵa ózgeredi. Óıtkeni bizde rezerv, ıaǵnı ósip kele jatqan jastar men kásipqoı boksta júrgen jigitter de bar. Bárimen kelissózder júrgizildi. Qazirgi tańda kásipqoı boksta júrgen jigitter kelýge daıyn», - dedi B. Artaev.

Onyń aıtýynsha, aldaǵy álem chempıonatyna jańarǵan quram baratyn bolady.

«Endigi másele ýaqyt enshisinde, olardyń qaısysy oqý-jattyǵý jıyndaryna birinshi bolyp kelýine baılanysty. Eger barlyǵy keletin bolsa, onda ulttyq quram 70-80 paıyzǵa aýysady. Osy oraıda álem birinshiligine basqa qurammen baramyz», - dedi memlekettik jattyqtyrýshy.

Budan buryn habarlanǵandaı, bokstan QR quramasynyń memlekettik jattyqtyrýshysy Baqtııar Artaev Olımpıdadaǵy boksshylardyń ónerine baǵa berdi.

Osy oraıda ol sportshylarda nashar kórsetkish bolǵanyn aıtty.

Sonymen qatar ol boksshylardyń daıyndyq kezeńi de ózgerýi yqtımal ekenin jetkizdi.