Bokstan ÁCh: Búgin qazaqstandyq 9 boksshy shırek fınaldyq kezdesýin ótkizedi

ASTANA. QazAqparat – Úndistannyń Nıý-Delı qalasynda bokstan áıelder arasynda ótip jatqan álem chempıonatynda búgin qazaqstandyq 9 sportshy shırek fınaldyq kezdesýlerin ótkizedi, dep habarlaıdy QazAqparat tilshisi.

Astana ýaqytymen saǵat 14.30-da bastalatyn kúndizgi sessııada birinshi bolyp Alýa Balqybekova (48 kg) rıngke shyǵady. Onyń qarsylasy – túrkııalyq Erıvan Barýt.

Sondaı-aq Karına Ibragımova (57 kg) venesýelalyq Omaılın Alkalamen, Mádına Nurshaeva (70 kg) brazılııalyq Barbara dos Santospen jáne Farıza Sholtaı (81 kg) kenııalyq Elızabet Adıambo Andıegomen qolǵap túıistiredi.

Saǵat 18.30-da bastalatyn keshki sessııada Jaına Shekerbekova (54 kg) kolýmbııalyq Marsela Arıaspen, Rımma Volosenko (60 kg) qytaılyq Venlý ıAnmen, Nadejda Rıabets (66 kg) Kabo-Verde ókili Ivanýsa Gomes Moreıramen sheberlik baıqasady. Al Valentına Halzova (75 kg) túrkııalyq Elıf Gıýnerımen jáne Lázzat Kúngeıbaeva (+81 kg) úndistandyq Nýpýrmen medal úshin talasady.

Álem chempıonaty «Qazsport» telearnasynan tikeleı efırden kórsetiledi.

Eske sala keteıik, budan buryn Alýa Balqybekovanyń shırek fınalǵa shyqqanyn jazǵan bolatynbyz.

Sondaı-aq Karına Ibragımova 1/8 fınalǵa joldama aldy.

Aıda Ábikeeva jarys jolynan shyǵyp qaldy.

Rımma Volosenko shırek fınalǵa ótti. Nadejda Rıabets te kelesi kezeńge joldama aldy.