Boksshy Sergeı Derevıanchenko qazaqtarǵa alǵys aıtty

NUR-SULTAN. QazAqparat - Ýkraınalyq boksshy Sergeı Derevıanchenko (13-1, 10 KO) Gennadıı Golovkınmen (39-1-1, 35 KO) bolatyn jekpe-jek aldynda qazaqstandyq jankúıerlerge alǵys aıtty. Bul týraly QazAqparat boksshynyń Instagram-daǵy paraqshasyna silteme jasap habarlaıdy.

«Meniń «Arlanstaǵy» jekpe-jekterimdi umytpaǵan, áleýmettik jelide maǵan jyly sózder aıtatyn barsha qazaqqa alǵys aıtamyn. Sol kez meniń de esimde, tamasha jyldar edi. Rahmet!», - dep jazdy Derevıanchenko Instagram-daǵy paraqshasyna.

Eske sala keteıik, Sergeı Derevıanchenko Búkilálemdik boks serııasynda (WSB) «Astana Arlans» klýby sapynda 2012-2014 jyldary óner kórsetken bolatyn. Sodan keıin kásipqoı bokstaǵy óziniń mansabyn bastaǵan.

Golovkın - Derevıanchenko aıqasy 5 qazan kúni Nıý-Iorktegi (AQSh) Madison Square Garden arenasynda bolady. Boksshylar birinshi baspasóz máslıhatyn ótkizip, kóz arbasty.