Boksshy Alýa Balqybekova álem chempıonatynyń fınalyna ótti

YSTANBUL. QazAqparat – Qazaqstandyq Alýa Balqybekova Ystanbul qalasynda ótip jatqan álem chempıonatynyń fınalyna shyqty, dep habarlaıdy QazAqparat tilshisi.

Azııa chempıony A.Balqybekova 48 kelige deıingi salmaqta jartylaı fınalda bolgarııalyq Sevda Asanovamen judyryqtasty.

Alýa birinshi raýndta qarsylasyn aýyr soqqylardyń astyna alyp, nokaýtqa jiberdi.

Alýa Balqybekova fınalda túrkııalyq Aıse Chagıryrmen altyn júldeni sarapqa salady.

Taǵy bir qazaqstandyq boksshy Jaına Shekerbekova qola júldeni qanaǵat tutty.

Ol 52 kelige deıingi salmaqta taılandyq Djýtamas Djıtpongpen rıngke shyqty. Bul jekpe-jekte jeńis tóreshilerdiń sheshimimen taılandtyq boksshyǵa berildi – 1:4.

Búgin taǵy úsh qazaqstandyq sportshy jartylaı fınalda kórsetedi.

Eske sala keteıik, budan buryn qazaqstandyq 5 boksshynyń álem chempıonatynyń jartylaı fınalyna ótkenin jazǵan bolatynbyz.