Boksshylarymyzdyń joldamaǵa degen yqylasy erekshe – Myrzaǵalı Aıtjanov

<p>ASTANA. KAZINFORM &ndash; Bokstan Italııanyń Býsto-Arsıtsıo qalasynda ótip jatqan lıtsenzııalyq týrnırge shákirtterin bastap barǵan Ulttyq quramanyń bas bapkeri Myrzaǵalı Aıtjanov jarystyń qalaı ótip jatqany týraly aıtyp berdi.</p>

«Jarys óte joǵary deńgeıde uıymdastyrylyp jatyr. Boksshylarymyzdyń joldamaǵa degen yqylasy da erekshe. Qazir ózderińiz kórip, bilip jatqandaı alǵashqy irikteý syndarynda judyryqtasqan boksshylarymyz jarysty óte sátti bastady. Qalǵan boksshylarymyz da jarysty osylaı bastap, joldamaǵa qoly jetkenshe aıanbaı judyryqtasýy kerek», — dedi bas bapker.

Tóreshiler jaǵynan bura tartý bolyp jatqan joq pa degen suraǵymyzǵa: «Ondaı barmaq basty, kóz qysty áreketterdi áli kezdestirgen joqpyz. Jarys qazirge taza, ádil ótip jatyr dep senimmen aıta alamyn. Ondaı bura tartý bolmaı-aq qoısyn dep tileıik. Kim myqty, sol Olımpıada joldamasyn jeńip alýǵa tilektespiz», — dedi bas bapker. Sonymen qatar Aıtjanov boksshylarǵa arnalǵan qonaqúı de óte jaıly ekenin atap ótti.

«Jatqan qonaqúıimiz de óte taza, yńǵaıly boldy. Jarys ótetin sport saraıyna 20-25 mınýtta jetemiz. Ózderi alyp baryp, alyp keledi. Jattyǵatyn jerimizde de barlyq jaǵdaı jasalǵan», — dedi Aıjanov.

Esterińizge sala keteıik, lıtsenzııalyq týrnırde 2024 jylǵy Parıj Olımpıadasynyń joldamalary sarapqa salynyp jatyr. Bylǵary qolǵap sheberleri erler arasynda 28, áıelder arasynda 21 joldamany sarapqa salady. 

Týrnır 3 naýryzda bastalyp, 12 naýryzda máresine jetedi.